"ყოველ წელს, საწარმოო ინციდენტების შედეგად, ათეულობით მუშა იღუპება და ასობით შავდება, გამოძიება კი იშვიათად მთავრდება ვინმეს პასუხისმგებლობის დაყენებით" - ამის შესახებ ნათქვამია Human Rights Watch-ის ანგარიშში, რომელშიც საქართველოში 2017 წელს განვითარებული მოვლენებია შეფასებული.
ანგარიშში, რომელიც ორგანიზაციის საქართველოს წარმომადგენლობამ გაავრცელა, აღნიშნულია, რომ სახალხო დამცველი და არასამთავრობო ორგანიზაციები შრომის, ჯანმრთელობისა და სოციალური დაცვის სამინისტროს დაქვემდებარებაში არსებულ შრომის ინსპექციას აკრიტიკებდნენ სტანდარტების აღსრულების უფლებამოსილების არქონის გამო.
„ყოველ წელს ათეულობით მუშა იღუპება და ასობით შავდება საწარმოო ინციდენტების შედეგად. სახალხო დამცველის ინფორმაციით, შრომის უსაფრთხოების ნორმების დაუცველობის გამო ბოლო 5 წელიწადში 270 ადამიანი გარდაიცვალა, მათგან 18 ადამიანი 2017 წლის პირველ ნახევარში დაიღუპა. სახალხო დამცველი და არასამთავრობო ორგანიზაციები შრომის, ჯანმრთელობისა და სოციალური დაცვის სამინისტროს დაქვემდებარებაში არსებულ შრომის ინსპექციას აკრიტიკებდნენ სტანდარტების აღსრულების უფლებამოსილების არქონის გამო, რის შედეგადაც სამუშაო ადგილებზე ვერ დაინერგა ჯანმრთელობის და უსაფრთხოების დაცვის ეფექტიანი ზომები. სამუშაოს შესრულების დროს მომხდარი ინციდენტების გამოძიება იშვიათად მთავრდება ვინმეს პასუხისმგებლობის დაყენებით," - ნათქვამია ანგარიშში.