„საქართველოში გაიხარჯა 29 222 დოზის ოდენობით ჯანმრთელობისთვის საფრთხის შემცველი ვაქცინა", - ამის შესახებ ინფორმაცია სახელმწიფო აუდიტის სამსახურის ოფიციალურ გვერდზეა განთავსებული.
უწყების ცნობით, შეძენილია პრეპარატი, რომელმაც კანონმდებლობით დადგენილი წესით რეგისტრაცია ვერ გაიარა და შესაბამისად, საქართველოს ბაზარზე დაშვების უფლება არ ჰქონდა.
"მიუხედავად ამისა, ბაზარზე დაშვების უფლება მოპოვებულია კომისიის გადაწყვეტილებით, რომლის თანახმად კომისიის მიერ ხარისხის დადასტურება ეფუძნება მინიმალურ სტანდარტებს.ჯანდაცვის მსოფლიო ორგანიზაციის საგანგებო რეკომენდაციით მოხმარებიდან უნდა ამოღებულიყო ჯანმრთელობისთვის საფრთხის შემცველი კონკრეტული ვაქცინა, რომელიც საქართველოს შემთხვევაში გაიხარჯა 29 222 დოზის ოდენობით“, - ვკითხულობთ აუდიტორული სამსახურის 2018 წლის გეგმაში, რომლის მიხედვითაც აუდიტის სამსახური 2016-17 წლებში ჩატარებული იმუნიზაციის პროგრამას შეამოწმებს.
პროგრამის შემოწმება 2010 წლის შემდეგა არ ჩატარებულა.
საბოლოო პასუხი, არსებობდა თუ არა დარღვევები იმუნიზაციის პროგრამაში, აუდიტის დასრულების შემდეგ გახდება ცნობილი.
როგორც დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის მოადგილე პაატა იმნაძე აცხადებს, აუდიტის სამსახური საუბრობს ცოფის ვაქცინაზე, რომელიც წესების სრული დაცვითაა ქვეყანაში შემოტანილი და მას არცერთ მომხმარებელზე უკუჩვენება არ ჰქონია.