„ქუთათელაძესთან კარგი, პარტნიორული ურთიერთობა ჰქონდა. ჩემი დაცვის ქვეშ მყოფიც ერთ-ერთი მეწილეა. ის ერთ-ერთი ბოლო იყო, რომელმაც ქუთათელაძე ცოცხალი ნახა, ეს გახდა პოლიციისთვის ეჭვის საბაბი და გამოკითხვაზე დაიბარეს“, - განუცხადა „ჯი-ეჩ-ენს“ გენერალ სამსონ ქუთათელაძის მკვლელობის საქმის გამოძიების პროცესში დაკავებული პირის ადვოკატმა, ალექსანდრე კობაიძემ.
ადვოკატის განმარტებით მისი დაცვის ქვეშ მყოფს გამოძიება არა მკვლელობასთან კავშირს, არამედ მამის კუთვნილ სახლში ამოღებულ იარაღის ვაზნებს ედავება.
„გამოძიება მას ბრალეულობას არ ედავება, ის გარდაცვლილ ქუთათელაძის საქმესთან დაკავშირებით მოწმის სახით გამოკითხეს, პარალელურ რეჟიმში ჩაატარეს არაერთი საგამოძიებო მოქმედება, მათ შორის, მისი მამის ბინის ჩხრეკა, საიდანაც ამოღებულ იქნა მამამისზე რეგისტრირებული იარაღის ვაზნები. სწორედ ამ ვაზნებთან დაკავშირებით მოხდა მისი დაკავება“, - აღნიშნავს კობაიძე.
ის მისი დაცვის ქვეშ მყოფს რამდენიმე საათში შეხვდება. როგორც ადვოკატი განმარტავს, დაკავებული თავს დამნაშავედ არ მიიჩნევს.
ცნობისთვის, დღეს გამთენიისას, შინაგან საქმეთა სამინისტრომ ყოფილი პარლამენტარის, გენერალ სამსონ ქუთათელაძის მკვლელობის საქმის გამოძიების პროცესში ერთი პირი დააკავა.
ის სისხლის სამართლის კოდექსის 236-ე მუხლითაა აყვანილი, რაც საბრძოლო მასალის მართლსაწინააღმდეგოდ შეძენა-შენახვას ითვალისწინებს.