კატალონიის პარლამენტის თავმჯდომარის პოსტზე მემარცხენე რესპუბლიკური პარტიის კანდიდატი როჯერ ტორენტი აირჩიეს. მისი მთავარი კონკურენტი პარტია „მოქალაქეების“ კანდიდატი ხოსე მარია ესპეხო საავედრა იყო.
„ჩემი გამოსვლა უნდა დაწყებულიყო სიტყვებით, გამარჯობა, ბატონო თავმჯდომარე და კატალონიის მთავრობის წევრებო, მაგრამ ისინი აქ არ არიან. ზოგი ციხეშია, ზოგი კი ქვეყნიდან არის განდევნილი“, - განაცხადა ახლადარჩეულმა სპიკერმა.
კატალონიის პარლამენტმა ესპანეთის შემადგენლობიდან გასვლას მხარი 27 ოქტომბერს დაუჭირა, თუმცა ესპანეთის საკონსტიტუციო სასამართლომ რეგიონალური პარლამენტის გადაწყვეტილება უკანონოდ ცნო.
21 დეკემბერს კატალონიაში ჩატარებული ვადამდელი რეგიონული არჩევნების შედეგებით კი 135-კაციან პარლამენტში კატალონიის დამოუკიდებლობის მომხრე პარტიებმა 70 მანდატი მოიპოვეს.