საქართველოს პრეზიდენტის, გიორგი მარგველაშვილის განცხადებით, გირგვლიანის საქმეზე, ყოფილი პრეზიდენტის, მიხეილ სააკაშვილის წინააღმდეგ წარდგენილი ბრალდება ქვეყნის იმიჯისთვის სამარცხვინოა, რადგან, მისივე თქმით, სააკაშვილს ბრალი წარედგინა იმაზე, რაზეც იურიდიულად ბრალის წარდგენა არ არის შესაძლებელი.
როგორც პრეზიდენტმა "რუსთავი 2"-ის გადაცემა "არჩევანში" განაცხადა, ის, რაც მას ეგონა რომ "ქართული ოცნების" ხელისუფლებაში მოსვლის დროს შეიცვლებოდა, პირიქით, განმტკიცდა.
„სააკაშვილი, რომელმაც მთელი ეს სისტემა ააგო, ეს პროკურატურა, თავისი ამ ტრადიციებით, ეს სასამართლო თავისი ტრადიციებით, ეს ყველაფერი, რაც ისე შექმნა, რომ საერთოდ არ დაინგრა იმის მერე, რაც ჩვენ მოვედით ხელისუფლებაში, ის რაც მე მეგონა, რომ ეს ყველაფერი შეიცვლებოდა, პირიქით, განმტკიცდა, გასტაბილურდა და ასე თქვათ, მიშას იდეოლოგიას ემსახურებიან ალალ-მართლად", - განაცხადა მარგველაშვილმა.
მისივე თქმით, სააკაშვილის სისტემამ მას აჯობა.
„ხერხდება, რომ გირგვლიანის საქმეზე წელში გამართული კი არ ვართ, არამედ ვართ კომიკურ მდგომარეობაში, რომ პრეზიდენტს წარვუდგენთ ბრალს იმაზე, რაზეც იურიდიულად ბრალის წარდგენა არ არის შესაძლებელი და ამ დროს, მე რას ვგრძნობ? მე ვგრძნობ, რომ სააკაშვილმა მაჯობა ამ პროცესში, მისმა სისტემამ მაჯობა, იმიტომ, რომ ის პროკურორები და ის მოსამართლეები, რომლებიც მისი ლოგიკით და მისი აზროვნებით არიან, დღეს გირგვლიანის საქმეზე ისეთ განაჩენს დაგიდებენ, რაც შენ იმ პერიოდის ბრძოლას გახდის კომიკურს", - აღნიშნა პრეზიდენტმა.
მან აქვე დასძინა, რომ მიხეილ სააკაშვილისთვის შეწყალების აქტს არ გამოიყენებს.