მათი ["ქართული ოცნების" წევრების] მესიჯი არის პრეზიდენტის წინააღმდეგ შავი პიარი და ასეთი სახის იქნება საარჩევნო კამპანია, - ასე გამოეხმაურა საქართველოს პრეზიდენტი გიორგი მარგველაშვილი ტელეკომპანია "იმედის" ეთერში გასულ სიუჟეტს, სადაც მარგველაშვილის მიერ შეწყალებულ პირთა საქმეები განიხილეს.
როგორც პრეზიდენტმა სამაუწყებლო კომპანია "რუსთავი 2"-ის გადაცემა "არჩევანში" აღნიშნა, "ქართული ოცნების" აქტიობებით ჩანს, რომ მათ საპრეზიდენტო კანდიდატი არ ჰყავთ.
„ქართულმა ოცნებამ“ დაიწყო საარჩევნო კამპანია, დაიწყო საპრეზიდენტო საარჩევნო კამპანია და „ქართულმა ოცნებამ“ ამ სიუჟეტით, კიდევ რამდენიმე სხვა სიუჟეტით, ამ კომენტარებით გვაჩვენა, პირველი, რომ საპრეზიდენტო კანდიდატი არ ჰყავთ და მათი მესიჯი არის პრეზიდენტის წინააღმდეგ შავი პიარი და ასეთი სახის იქნება საარჩევნო კამპანია", - განაცხადა გიორგი მარგველაშვილმა, თუმცა, მან არ დააკონკრეტა, ეშინიათ თუ არა „ქართულ ოცნებაში“ მისი კანდიდატურის.
პრეზიდენტმა შეწყალების უფლებაზე კიდევ ერთხელ ისაუბრა და აღნიშნა, რომ ეს უბრალოდ ჰუმანური აქტია.
„შეწყალება არ ნიშნავს იმას, რომ ამ ადამიანებს ვინმე ეუბნება, რომ ისინი არიან უდანაშაულოები, შეწყალება არ ნიშნავს იმას, რომ ვინემ ამბობს, რომ სასამართლომ არასწორი გადაწყვეტილება გამოიტანა. შეწყალება არის ჰუმანური აქტი", - დასძინა პრეზიდენტმა.
