„ყველა მოსამართლეს აქვს შანსი, საკუთარი ობიექტურობა დაამტკიცოს. თუ მოსამართლე ამ შანსს გამოიყენებს, გამამართლებელი განაჩენი დადგება, თუ იგივე გავლენების ქვეშ მოექცევა, როგორც პირველი ინსტანციის სასამართლო, მაშინ რა თქმა უნდა, დადებითი მოლოდინი ვერ მექნება“, - განუცხადა „ჯი-ეიჩ-ენს“ მსჯავრდებულ დეკანოზ გიორგი მამალაძის ადვოკატმა, გიორგი ფანცულაიამ.
თბილისის სააპელაციო სასამართლოში ხვალ, 12:30 საათზე დეკანოზ გიორგი მამალაძის საქმის განხილვა განახლდება. ხვალ ბრალდების მხარე დასკვნით სიტყვას წარმოთქვამს. დაცვის მხარე დასკვნით სიტყვას სავარაუდოდ, მომდვენო პროცესზე, 31 იანვარს წარმოთქვამს.
სახელმწიფო ბრალდება დეკანოზისთვის ბრალის დამძიმებას და მის გასამართლებას სისხლის სამართლის კოდექსის 109-ე მუხლით მოითხოვს, რომელიც განხზრახ მკვლელობის ანგარებით მომზადებას გულისხმობს. აღნიშნული ბრალი პირველი ინსტანციის სასამართლომ არ გაიზიარა და დეკანოზი 108-ე მუხლით, განზრახ მკვლელობის მომზადებისთვის გაასამართლა.
დაცვის მხარე დეკანოზის უდანაშაულოდ ცნობას მოითხოვს.
„დეკანოზთან შესული იყვნენ მიხეილ რამიშვილი და მია ზოიძე, მასთან კომუნიკაცია მეც მქონდა. ის იგივე პოზიციაზეა, საკუთარი უდანაშაულობის დასამტკიცებლად ბოლომდე იბრძოლებს. ნაკლებად სავარაუდოა, რომ ხვალინდელ სასამართლო პროცესზე ის გამოცხადდეს, რადგან მოგეხსენებათ, წინა პროცესი პროტესტის ნიშნად დატოვა“, - აცხადებს ფანცულაია.
შეგახსენებთ, რომ დეკანოზი გიორგი მამალაძე თბილისის საქალაქო სასამართლომ 5 სექტემბერს, პატრიაქრის მდივან-რეფერენტის, შორენა თეთრუაშვილის განზრახ მკვლელობის მომზადებისთვის გაასამართლა.
