„როცა ვეჭიდავებოდი ძირს დაწოლაზე, იარაღი მაშინ გავარდა“, - განაცხადა სასამართლო პროცესზე დაკითხვისას მოწმე გიორგი ბაშალეიშვილმა.
მისი განმარტებით, ტაბელური იარაღიდან მხოლოდ ერთი გასროლის გარდა, მეტი სროლა არ განუხორციელებია. პროკურორის კითხვაზე ტყვიის მეორე მასრა საიდან აღმოჩნდა შემთხვევის ადგილზე, ბაშალეიშვილმა უპასუხა რომ ეს თავადაც უკვირს.
მოწმის განცხადებით მან, აღნიშნული იარაღი დილით სამსახურში, სამორიგეოში ჩააბარა და შემდეგ თუ სად წაიღეს, ეს მისთვის ცნობილი არ არის.
შეგახსენებთ, რომ იმჟამინდელი პატრულ-ინსპექტორი, გიორგი ბაშალეიშვილი 2006 წელს ბუტა რობაქიძის სიცოცხლის გაუფრთხილებლობით მოსპობისთვის გაასამართლეს. მან ორწლიანი სასჯელი მოიხადა.
ხელახალი გამოძიების ფარგლებში, რომელიც 2012 წელს დაიწყო, სახელმწიფო ბრალდება ბუტა რობაქიძის მკვლელობის საქმეზე სამსახურებრივი უფლებამოსილების ბოროტად გამოყენებას შსს ყოფილ მაღალჩინოსნებს ედავება. აღნიშნულზე ბრალდებულია 5 პირი: გურამ დონაძე, ირაკლი ფირცხალავა, ზაზა ბაქრაძე, დავით იაშვილი და ზურა მიქაძე.
