ტერორიზმში მსჯავრდებული მერაბ ყოლბაია, იგივე „კოჭოია“, სასჯელაღსრულების სამინისტრომ გლდანის ციხიდან ბათუმში, მაღალი რისკის საპატიმრო დაწესებულებაში გადაიყვანა. აღნიშნული „ჯი-ეიჩ-ენს“ ყოლბაიას ადვოკატმა, გელა ნიკოლაიშვილმა დაუდასტურა.
„ოფიციალურად, სასჯელაღსრულების სამინისტროში მიპასუხეს, რომ ყოლბაიას რისკის დონე განსაზღვრული არ ჰქონდა და რადგან განსაკუთრებით მძიმე დანაშაულშია მსჯავრდებული, ამიტომ იქნა ბათუმში გადაყვანილი. რისკის დონეს კომისია განსაზღვრას, რომელიც რამდენიმე ადამიანისგან შედგება. სწორედ ამ კომისიის დასკვნის საფუძველზე მოხდა ყოლბაიას ბათუმში გადაყვანა“, - აცხადებს ადვოკატი.
როგორც ნიკოლაიშვილი აღნიშნავს, მან ყოლბაიას გადაყვანის შესახებ სხვა პატიმრებისგან შეიტყო.
„მისი გადაყვანის ფაქტის შესახებ გვიან, ერთი კვირის შემდეგ, სხვა პატიმრისგან გავიგე, ამის შემდეგ მოვიკითხე, თუ რატომ გახდა მისი გადაყვანა საჭირო. პერიოდულად, რისკის გადასინჯვა ხდება. იმედი მაქვს, რომ რამდენიმე თვეში, ამ რისკის დონის გადასინჯვა მოხდება და ის ისევ გლდანში იქნება გადმოყვანილი“, - განაცხადა ნიკოლაიშვილმა.
მისი განმარტებით, ყოლბაიას ციხის ადმინისტრაციასთან პრობლემები არ ჰქონია, არც ცუდი ყოფაქცევით გამოირჩეოდა.
„როცა ის დააპატიმრეს, საშინელი წამებები გადაიტანა, ის დაზარალებულადაც კი არის ცნობილი, მაგრამ ახალი ხელისუფლების პერიოდში არც მას ჰქონია ციხის ადმინისტრაციასთან პრეტენზია და არც მის მიმართ ყოფილა ადმინისტრაციის მხრიდან პრეტენზია“, - განმარტავს ადვოკატი.
ის აღნიშნულ ფაქტს ყოლბაიას საქმის ხელახალ გამოძიებას არ უკავშირებს.
„ხელახალ გამოძიებას პროკურატურა აწარმოებს, რისკებს კი სასჯელაღსრულების სამინისტრო საზღვრავს, ამიტომ არ მგონია, ეს ყველაფერი საქმის ხელახალ გამოძიებას უკავშირდებოდეს“, - განაცხადა ნიკოლაიშვილმა.
შეგახსენებთ, რომ 2010 წლის სექტემბერ-ნოემბერში საქართველოს ტერიტორიაზე იდენტური ხელწერით, რამდენიმე აფეთქება მოხდა. მათ შორის მუხიანში, ცენტრალურ ქუჩაზე, „ლეიბორისტების“ ოფისთან, ჯავახიშვილზე, ამერიკის საელჩოსთან და ტელეკომპანია „იმედის“ მიმდებარედ.
მომხდარიდან მალევე, შინაგან საქმეთა სამინისტროში აფეთქებების სერიას ტერაქტის კვალიფიკაცია მიენიჭა და დააკავეს „კოჭოიად“ ცნობილი მერაბ ყოლბაია, ასევე გოგიტა არქანია, რომელიც როგორც ცნობილია, ყოლბაიასგან განსხვავებით, კვლავ გლდანის სასჯელაღსრულების #8 დაწესებულებაში რჩება.
2011 წელს, მერაბ ყოლბაიას ჩვენების საფუძველზე ბრალი წარედგინა კიდევ 13 პირს, მათ შორის სამს დაუსწრებლად. დანარჩენი ათი ტერორისტული აქტის მოწყობისა და ორგანიზების ბრალდებით დააკავეს.