რუსული გაზეთი „ნეზავისიმაია გაზეტა“ საქართველოს ექს-პრეზიდენტ და ოდესის ოლქის ყოფილი გუბერნატორ, მიხეილ სააკაშვილთან დაკავშირებულ ბოლო მოვლენებს ეხმიანება და სტატიას სათაურით - „თბილისი მიხეილ სააკაშვილის ექსტრადირებას ცდილობს, ქართველი პროკურორები პრეზიდენტების წინააღმდეგ“ აქვეყნებს.
იური როქსის მიერ მომზადებულ მასალაში განხილულია თბილისის საქალაქო სასამართლოს განაჩენი მიხეილ სააკაშვილის მიმართ და კიევის საპელაციო სასამართლოში საქმის განხილვა მისი შინაპატიმრობის თაობაზე.
პუბლიკაციაში ვრცლადაა გადმოცემული, როგორც საქართველოს პროკურატურის კომენტარი ყოფილი პრეზიდენტის მიხეილ სააკაშვილისათვის თავისუფლების სამწლიანი აღკვეთის შესახებ („პრეზიდენტის უფლებამოსილების ბოროტად სარგებლობა, რომელიც გამოიხატა სანდრო გირგვლიანის მკვლელობისთვის დაკავებულთა შეწყალებაში“), ასევე საქართველოს დღევანდელი პრეზიდენტის, გიორგი მარგველაშვილის განცხადება, რომ პრეზიდენტის დასჯა მისი დისკრეციული უფლებით (შეწყალება) სარგებლობის გამო, ქვეყნის კონსტიტუციას ეწინააღმდეგება.
საინტერესოა, რომ მიხეილ სააკაშვილმა გიორგი მარგველაშვილის ნათქვამი თავის სასარგებლოდ გამოიყენა და სოციალურ ქსელ Facebook-ზე ჩაწერა: „თვით ჩემი ოპონენტიც კი, მოქმედი პრეზიდენტი მარგველაშვილი თვლის, რომ სასამართლოს გადაწყვეტილება ჩემ მიმართ განხორციელებული პოლიტიკური დევნაა“.
„მართალია, გიორგი მარგველაშვილს პროკურორმა ირაკლი ნადარეიშვილმა უპასუხა („კონსტიტუციური უფლება არ ნიშნავს ამ უფლების ბოროტად გამოყენებას. როგორც ჩანს, მარგველაშვილი ფიქრობს, რომ მართლმსაჯულებას კითხვები მის მიმართაც გაუჩნდება“), მაგრამ ქართული საზოგადოების მნიშვნელოვანი ნაწილი ეჭვობს, რომ ხელისუფლება ექსტრადირების საკითხს მხოლოდ ფორმალურად უდგება: სინამდვილეში მთავრობას ექს-პრეზიდენტის უკრაინიდან საქართველოში ჩამოყვანა არ სურს - თბილისისთვის უფრო კარგი იქნება, თუ მსჯავრდებული მიხეილ სააკაშვილი კიევში დარჩება და „მზის ქვეშ ადგილისათვის“ ბრძოლას უკრაინაში გააგრძელებს“, - აღნიშნულია სტატიაში.
