„მიხოს პერსპექტივა: სამვარიანტიანი ბედი“ - ამ სათაურით უკრაინული გაზეთი „რაბოჩაია გაზეტა“ აქვეყნებს სტატიას, რომელშიც რედაქციის მიერ მიმოხილულია უკრაინაში, გასული კვირის განმავლობაში მომხდარი მოვლენები, მათ შორის საქართველოს ყოფილი პრეზიდენტისა და ოდესის ოლქის ყოფილი გუბერნატორის, მიხეილ სააკაშვილის ირგვლივ განვითარებული მოვლენები.
„ქართული თემიდის მიერ განაჩენის გამოტანა კიევ-თბილისს შორის ფარული მოლაპარაკების გარეშე ვერ მოხდებოდა. თუ მთლად სნაიპერული სიზუსტით ვივარაუდებთ, ამ საქმეში ორივე დედაქალაქში არსებული აშშ-ის საელჩოები არიან ჩარეულნი.“, - წერს ავტორი და დასძენს, რომ „მთავარია როგორი იქნება ოპერაცია „ექსტრადიციის“ განვითარების ვერსიები“.
„მიხო სააკაშვილის ირგვლივ ქაფი და ბუშტები კვლავ არ ქრება. როგორც ჩანს, ასეთია საქართველოს ექს-პრეზიდენტის დანიშნულება: მის შესახებ იმდენი რამ ვრცელდება, რომ რომ ძნელია ჭეშმარიტებაში გარკვევა.
ახალი წლის პირველ დღეებშივე შევიტყვეთ, რომ თბილისის საქალაქო სასამართლომ მიხო სააკაშვილი დამნაშავედ სცნო პრეზიდენტობის დროს „უფლებამოსილების ბოროტად გამოყენებაში“ და მას დაუსწრებლად სამი წლით ციხე მიუსაჯა. გონივრული ეჭვი მაქვს, რომ ქართული თემიდის მიერ განაჩენის გამოტანა კიევ-თბილისს შორის ფარული მოლაპარაკების გარეშე ვერ მოხდებოდა. და თუ მთლად სნაიპერული სიზუსტით ვივარაუდებთ, ამ საქმეში ორივე დედაქალაქში არსებული აშშ-ის საელჩოები არიან ჩარეულნი. ხომ გახსოვთ „სომხური რადიოს“ ცნობილი ავიამარშრუტი - „თბილისიდან ერევანში კამჩატკის გავლით“? ჰოდა, ახლაც ისეა, როგორც იმ ანეკდოტში - „კიევიდან თბილისში ვაშინგტონის გავლით“.
თუ ვინმემ ვერ გაიგო, ავუხსნი: მიხეილ სააკაშვილს სტატუსი შეუცვალეს, იგი უკვე მსჯავრდებულია. უკრაინის გენპროკურატურის სპიკერმა ანდრეი ლისენკომ ძალიან მიკიბ-მოკიბულად კი გვითხრა, თუმცა მთავარი მაინც გავიგეთ: ევროპული კონვენციის თანახმად, პირის ექსტრადიცია ხდება მის მიერ დანაშაულის ჩადენისა და მისთვის მსჯავრის დადების შემდეგ. ე.წ. საექსტრადიციო შემოწმება სრული სვლით მიდის - მიხოს ხან გენერალურ პროკურატურაში იძახებენ, ხან უშიშროების სამსახურში. მართალია, იგი არცერთში არ ცხადდება და აშკარად იანკების (ამერიკელების) რეაქციას ელოდება, მაგრამ აშკარაა, რომ საქართველოს ყოფილი პრეზიდენტი ხაფანგშია გამოჭერილი თვითონ დაიგო მახე თუ სხვამ დაუგო, უკვე მნიშვნელობა არ აქვს, ახლა მთავარია როგორი იქნება ოპერაცია „ექსტრადიციის“ განვითარების ვერსიები.
აი, აქ უკვე კარტი ჩვენს ხელშია, შეიძლება სხვადასხვა ვარიანტები გავითამაშოთ.
დავიწყოთ მიხოსთვის ყველაზე ცუდი ვარიანტით:
პირველი - შეიპყრეს, გაკოჭეს, თავზე ტომარა და - თბილისი. იქ უკვე მას კიდევ სამი საქმე ელოდება, რომელთაგან ერთ-ერთი სამუდამო პატიმრობას ითვალისწინებს. აქვე შევნიშნავთ: ექს-პრეზიდენტს თბილისში ბევრი ისეთი „მეგობარიც“ ჰყავს, რომლებიც უამრავ ფულს დახარჯავენ, რომ მიხომ სასამართლომდე ცოცხალმა ვერ მიაღწიოს. მოკლედ, ცუდი პერსპექტივაა;
მეორე - მიხოს ექსტრადირება ხდება რომელიმე ევროპულ ქალაქში, იქ ცოლს ახვედრებენ და „ცეერუ“-ს ღრმა რეზერვში გადაჰყავთ;
მესამე (საოცნებო) - ექსტრადიცია დეპორტაციით იცვლება, მიხოსთან ერთად საქართველოში დეპორტით იგზავნება მთელი ვერხოვნა რადა და მინისტრთა კაბინეტი, პრეზიდენტ პეტრო პოროშენკოს ჩათვლით. რა თქმა უნდა, ამ ვერსიით საქართველო ცუდ დღეში აღმოჩნდება, მაგრამ უკრაინამ, ბოლოს და ბოლოს, როდისმე ხომ უნდა იზრუნოს თავის ეროვნულ ინტერესებზეც“, - ნათქვამია სტატიაში.
