გამოძიებამ დაადასტურა რომ ირაკლი ფირცხალავას მიერ დასახელებული მიზეზი, რის გამოც მან ჩვენების მიეცამაზე უარი არაერთხელ განაცხადა, უსაფუძვლო და მოგონილია, - განაცხადა სასამართლო პროცესის დასრულების შემდეგ ირაკლი ფირცხალავას საქმის პროკურორმა ლაშა კოტრიკაძემ.
მისი თქმით, დღევანდელ პროცესზე დაიკითხა ბრალდების ორი მოწმე - სასჯელაღსრულების დეპარტამენტის თანამშრომელი გიორგი თოიძე და პროკურორი დავით გუმბერიძე, რომელიც საქმეზე საპროცესო ხელმძღვანელობას ახორციელებდა. თბილისის საქალაქო სასამართლო კრიმინალური პოლიციის ყოფილი უფროსის, ე.წ კორტების სპეცოპერაციის საქმეზე მსჯავრდებულის, ირაკლი ფირცხალავას საქმეს განიხილავდა.
ლაშა კოტრიკაძის განცხადებით, დავით გუმბერიძემ ისაუბრა იმ უსაფუძვლო გარემოებების შესახებ, რასაც ირაკლი ფირცხალავა ჩვენების მიცემაზე უარის თქმის მიზეზად ასახელებდა.
„პროკურორმა დავით გუმბერიძემ დეტალურად ისაუბრა იმ ფაქტობრივი გარემოებების შესახებ თუ როგორ არ მისცა ჩვენება მსჯავრდებულმა ფირცხალავამ ჯერ ერთხელ გამოძიებაში შემდეგ კი ორჯერ, მოსამართლის განჩინების საფუძველზე. მან ასევე, ისაუბრა ირაკლი ფირცხალავას მიერ ჩვენების მიცემაზე უარის თქმის მიზეზად დასახელებული გარემოებების უსაფუძვლობის შესახებ. სინამდვილეში, ეს ყველაფერი, მოგონილი იყო და სწორედ, ჩვენების მიცემაზე უარის თქმას ემსახურებოდა. ერთ-ერთი გარემოება, რასაც ის ასახელებდა თუ რატომაც არ უნდოდა ჩვენების მიცემა, იყო ის, რომ თითქოს მასზე განხორციელდა ზეწოლა კონკრეტული პროკურორისა და გამომძიებლის მხრიდან. ამ გამოძიების ფარგლებში დადასტურდა მისი საჩივრისა და პრეტენზიის უსაფუძვლობა", - განაცხადა ფირცხალავას საქმის პროკურორმა, ლაშა კოტრიკაძემ.
საქართველოს პროკურატურამ მსჯავრდებული ირაკლი ფირცხალავა ჩვენების მიცემაზე უარისთვის 27 სექტემბერს სისხლის სამართლის პასუხისგებაში მისცა.
მთავარმა პროკურატურამ ფირცხალავას წინააღმდეგ გამოძიება ირაკლი მამალაძის განცხადების საფუძველზე 2017 წლის 25 ივნისს დაიწყო. გამოძიებას საფუძვლად დაედო ბრალდების მხარის მოწმის, ჟურნალისტ ირაკლი მამალაძის განცხადება. მისი მტკიცებით, მსჯავრდებული ირაკლი ფირცხალავა "მიზანმიმართულ ფსიქოლოგიურ ზემოქმედებას, მის დისკრედიტაციას და პატივისა და ღირსების შელახვას" ახდენდა. მოწმის თქმით, ზეწოლა მიზნად ისახავდა სასამართლოში მიცემული ჩვენების შეცვლას. ირაკლი ფირცხალავას სისხლის სამართლის კოდექსის 371-ე მუხლით ბრალი წარედგინა. მთავარი პროკურატურის ინფორმაციით, ირაკლი ფირცხალავამ ჩვენების მიცემაზე უარი არაერთხელ განაცხადა. საგამოძიებო უწყების ინფორმაციით, 2017 წლის 6 ივლისს, სასჯელაღსრულების მე-9 პენიტენციურ დაწესებულებაში დაიგეგმა ირაკლი ფირცხალავას მოწმის სახით გამოკითხვა, რა დროსაც მან უარი განაცხადა ჩვენების მიცემაზე. შემდეგ 7 ივლისს, თბილისის საქალაქო სასამართლოს მოსამართლე, სასამართლო შემადგენლობით გამოცხადდა N9-ე პენიტენციურ დაწესებულებაში, რათა ირაკლი ფირცხალავა დაეკითხა, თუმცა, მან კვლავ უარი განაცხადა ჩვენების მიცემაზე. 26 ივლისს, ბრალდების მხარემ კვლავ მიმართა თბილისის საქალაქო სასამართლოს ირაკლი ფირცხალავას მოწმის სახით სასამართლოს წინაშე დაკითხვის თაობაზე. შუამდგომლობა დაკმაყოფილდა და მოსამართლემ გამოსცა შესაბამისი განჩინება.ირაკლი ფირცხალავამ მორიგ ჯერზეც უარი განაცხადა. 27 ივლისს, პროკურორის შუამდგომლობის საფუძველზე მოსამართლემ მიიღო გადაწყვეტილება მოწმის N9 პენიტენციურ დაწესებულებაში დაკითხვის შესახებ. ირაკლი ფირცხალავამ კვლავ უარი განაცხადა ჩვენების მიცემაზე.
კრიმინალური პოლიციის ყოფილ უფროსს ირაკლი ფირცხალავას და ყოფილ პოლიციელ გიორგი ცააძეს სასამართლომ 12-12-წლიანი პატიმრობა მიუსაჯა. მათ ზურა ვაზაგაშვილისა და ალექსანდრე ხუბულოვის განზრახ მკვლელობა ედებათ ბრალად.