თბილისის საქალაქო სასამართლოში ირაკლი ფირცხალავას საქმის განხილვა დასრულდა.
როგორც ბრალდებულის ადვოკატმა, დავით ცინცქილაძემ განაცხადა, მისი დაცვის ქვეშ მყოფს სთხოვდნენ, ე.წ ციანიდს საქმეზე, მოწმის სახით, ჩვენება არ მიეცა.
"დღევანდელ საქმეზე დაკითხულმა პროკურორმა დავით გუმბერიძემ ცალსახად დაადასტურა, რომ ჩემი დაცვის ქვეშ მყოფის მიმართ ახორციელებს დისკრიმინაციას პოლიტიკური ნიშნით. პროკურორმა დავით გუმბერიძემ ისეთ მოვლენაზე დაიწყო გამოძიება, რომელიც დანაშაულის ნიშნებს არ შეიცავდა. ჩემი დაცვის ქვეშ მყოფის მიმართ მას ჰქონდა მხოლოდ და მხოლოდ ის პრეტენზია, რომ მან მისცა ჩვენება ე.წ ციანიდის საქმეზე", - განმარტა ადვოკატმა.
მისივე შეფასებით, მოსამართლე ნინო ნაჭყებია პოლიტიკური ნიშნით არის შერჩეული.
"ხელწერაც სასამართლო პროცესს ეტყობა, სახელმწიფომ მტკიცებულებები გადამალა. ჩვენ მოსამართლეს ვთხოვდით, დაეკმაყოფილებინა შუამდგომლობა იმ ვიდეომტკიცებულებების ამოღების თაობაზე, რომელიც საქმეში ჭეშმარიტების დადგენაში დაგვეხმარებოდა, მაგრამ მან უარი განაცხადა", - აღნიშნა დავით ცინცქილაძემ.
ცნობისთვის, ირაკლი ფირცხალავას სახელმწიფო ბრალდება მოწმე ირაკლი მამალაძეზე ზემოქმედების მოხდენის ფაქტზე ჩვენების მიცემაზე უარის თქმას ედავება.
