ბუტა რობაქიძის მკვლელობის საქმეზე სამსახურეობრივი უფლებამოსილების ბოროტად გამოყენების ნაწილში შსს ყოფილი მაღალჩინოსნების წინააღმდეგ საქმის განხილვა დღეისთვის დასრულდა. სასამართლოს ჩვენება იმჟამინდელმა კრიმინალური პოლიციის სამმართველოს უფროსმა, ლეონიდ ლობილაძემ მისცა.
"მე როცა მივედი ავტომატი უკვე იდო. გარდა ერთი ავტომატისა სხვა დეტალები რომ შემემჩნია არ მახსოვს", - განაცხადა პროცესზე ლეონიდ ლობილაძემ.
ჩვენება გადაცემა "პატრულის" ჟურნალისტმა გიორგი გოგიაშვილმაც მისცა.
როგორც პროცესის შემდეგ ერთ-ერთმა ბრალდებულმა, გურამ დონაძემ განაცხადა, სიმართლეს ამბობენ ის ადამიანები, რომლებიც დღეს სახელმწიფო სამსახურში არ არიან.
"კრიმინალური პოლიციის სამმართველოს უფროსმა დღეს თქვა, რომ როცა ის ადგილზე მივიდა იარაღი იქ იდო და შემდეგ მოხდა მისი დათვალიერება, აღწერა, დალუქვა და ა.შ.
ყველა მოწმე ამბობს იმას, რაც მან რეალურად დაინახა, მაგრამ იმას თუ რატომ ამბობენ, რომ იარაღები არ იყო და მერე იყო, ეს ცალკე თემაა.
სიმართლეს ამბობენ ის ადამიანები, რომლებიც დღეს სახელმწიფო სამსახურში არ არიან. რომლებიც სახელმწიფო სამსახურში არიან, ისინი არასწორ ჩვენებებს აძლევენ. სიმართლისთვის მადლობა მინდა ვუთხრა საზოგადოებრივი მაუწყებლის თანამშრომელს, გიორგი გოგიაშვილს. პროკურატურა მისგან ცდილობდა რამენაირად ეთქმევინებინა, რომ იქ დონაძე რამეს, ან მონტაჟს მიუთითებდა. გოგიაშვილმა თქვა ის, რაც რეალურად იყო. მან აღნიშნა, რომ კადრებს იღებდა და სამონტაჟოში ტოვებდა, გურამი არაფერს მიმითითებდაო. წინა მოწმემ, ოპერატორმა, ლევან შერმადინმა თქვა, ჩემს კამერაზე ნებისმიერი მოქმედების განხორციელება, გადახვევა, ყურება შეიძლებოდაო, მაგრამ დასძინა, რომ იყო კამერები წებოთი, ბეჭდით, დალუქული და დაშტამპულიო. საუბარია მუკბანიანის ოპერატორის კამერაზე, ის დაკითხული არ არის, მას პროკურატურამ ინსულტის ცნობა გაუფორმა, რომ არ ეთქვა ეს კადრები მისი გადაღებული რომ არის. სწორედ მისი კამერა იყო დალუქული, ეს კამერა აქვს შსს. სად და როგორ არის, ეს მომავალ პროცესებზე გამოჩნდება",- განაცხადა გურამ დონაძემ.
