საქართველოს პრეზიდენტის სასახლეში დღეს პირველი ლედის მონაწილეობით „მშობელთა თემის მობილიზება და გაძლიერება ქვეყნის მასშტაბით“ შემაჯამებელი ღონისძიება გაიმართა, რომელიც საქართველოს პრეზიდენტის სარეზერვო ფონდის დაფინანსებით განხორციელდა.
8 თვიანი პროექტი პირველი ლედის პატრონაჟით „კოალიციმ მოძრაობა ცვლილებებისთვის“ განახორციელა, რომელიც შეზღუდული შესაძლებლობის მქონე პირების მშობელთა ორგანიზაციებს აერთიანებს.
პროექტის ფარგლებში, კოალიციამ საქართველოს 6 მუნიციპალიტეტში შშმ პირთა მშობელთა თემთან და ადგილობრივ ხელისუფლებასთან იმუშავა შშმ პირების მშობელთა ცნობიერების ამაღლების მიმართულებით საინფორმაციო შეხვედრებისა და ტრენინგების საშუალებით, რომელიც ჩატარდა შშმ პირთა უფლებების და კონვენციის შესახებ, მშობელთა როლთან, ადგილობრივ და ცენტრალურ სახელმწიფო პროგრამებთან, გადაწყვეტილების მიღების პროცესში ადვოკატირებასთან დაკავშირებით.
საქართველოს პირველი ლედის მაკა ჩიჩუას განცხადებით, ეს გრძელვადიანი პროექტი უმნიშვნელოვანესია ამ საჭიროებების მქონე პირებისათვის, რადგან გულისხმობს მშობელთა ინფორმირებას მათ უფლებებთან და კონკრეტულ სერვისებთან დაკავშირებით და ასევე ბავშვების ადრეული განვითარების ხელშეწყობას.
„ჩვენი ამოცანა ძალიან ზუსტი იყო. პირველი ნაბიჯი გადადგმულია ეფექტურად და ძალიან დიდი იმედი მაქვს, არ გაჩერდება ეს მოძრაობა, რადგან, როგორც კი პატარა პაუზა გაკეთდება, ყველაფერი შეჩერდება და თავიდან დასაწყები იქნება. ამიტომ ჩვენ ეს გათვლილი გვაქვს გრძელვადიან, ძალიან აქტიურ სვლაზე, რომ მივიღოთ ის შედეგები რისთვისაც ვიარეთ მთელ საქართველოში“, - განაცხადა მაკა ჩიჩუამ.
კოალიციის ხელმძღვანელის ლია ტაბატაძის ინფორმაციით, პროექტის ფარგლებში მოხდა მშობელთა საინიციატივო ჯგუფების ფორმირება, შეიქმნა 1 რეგისტრირებული ორგანიზაცია სიღნაღში, დამყარდა კავშირები მშობელთა თემსა და მუნიციპალიტეტის შესაბამის სამსახურებს შორის. მუნიციპლიტეტისათვის შემუშავდა კონკრეტული რეკომენდაციები 2018 წლის პროგრამებთან დაკავშირებით, ბაღებში ადრეული განვითარების სერვისის ინტეგრირებასთან, სახელობო და სპორტულ წრეებში შშმ ბავშვებისათვის ქვოტების გამოყოფასთან, მშობელთა ვალდებულებებზე სოციალური დახმარების მიბმასთან დაკავშირებით .
შემაჯამებელ ღონისძიებაზე გაწეული სამუშაოს შედეგები წარმოადგინეს ადგილობრივი თვითმმარელობებისა და და მშობელთა წარმომადგენლებმა სიღნაღის, ბოლნისის, ჭიათურის, საჩხერის, ოზურგეთისა და ხელვაჩაურის მუნიციპალიტეტებიდან.