თბილისის საქალაქო სასამართლოში, ამ წუთებში დასრულდა ვალერი გელაშვილის ცემის ფაქტზე საქმის განხილვა. დღეს სასამართლოს ჩვენება მისცა გამომძიებელმა დავით ბაინდურაშვილმა.
საქმეზე ცემის ორგანიზებაში ბრალდებულის, საქართველოს ყოფილი პრეზიდენტის, მიხეილ სააკაშვილის ადვოკატის, გიორგი ჩივიაშვილის განცხადებით, სააკაშვილის მიმართ მიმდინარე პროცესები აბსოლუტურად, პოლიტიკური მასკარადია.
„გამომძიებელმა ჩემს კითხვას, რამდენად სრულფასოვნად გამოკითხა ირაკლი ოქრუაშვილი, უპასუხა, რომ ოქრუაშვილს სანადიროდ ეჩქარებოდა და შესაძლებელია, ეს გამოკითხვა სრულყოფილი არ იყოს. ეს ყველფერი ხდება იმის ფონზე, როცა სტრასბურგის სასამართლომ დადასტურებულად მიიჩნია, რომ ვანო მერაბიშვილი საკნიდან გაიყვანეს, რათა მიხეილ სააკაშვილზე ინფორმაცია მიეღოთ.
ოქრუაშვილი კი ჯეროვნად ვერ დაკითხეს, იმის გამო, რომ სანადიროდ ეჩქარებოდა. ამაზე მეტი ცინიზმი რა შეიძლება იყოს? კიდევ უარესს გეტყვით, 6 სპეცრაზმელი არასამუშაო საათებში მიადგა პროკურატურას, დარეკეს, განცხადებას კანცელარიაში ვერ ვაბარებთო. პროკურორმა გამომძიებელს დაურეკა, რომელმაც ექვსივე სპეცრაზმელი შეიეყვანა და იმ მომენტიდანვე დაიწყეს დაკითხვა. ამდენი ტყუილი ერთ საქმეში, ამდენი ცდომილება, უბრალოდ სირცხვილია და წარმოუდგენელია. ასეთ საქმეებზე აქვს სააკაშვილს ბრალი წარდგენილი“, - განაცხადა ადვოკატმა.