„შენ ხარ ფე-ეს-ბე-ს აგენტი და პუტინის მონა“ ამ შეძახილებით დატოვეს სასამართლო დარბაზი საქართველოს ყოფილი პრეზიდენტის და ოდესის ოლქის ყოფილი გუბერნატორის, მიხეილ სააკაშვილის მხარდამჭერებმა.
ცოტა ხნის წინ გახდა ცნობილი, რომ სააკაშვილმა ადვოკატები აიცილა. როგორც ადვოკატმა დავით კაკოიშვილმა განმარტა, სააკაშვილი მიიჩნევს, რომ მის წინააღმდეგ საქართველოსა და უკრაინაში პოლიტიკური დევნა მიმდინარეობს და სასამართლოს შემადგენლობის მიმართ უნდობლობა აქვს.
„მიხეილ სააკაშვილი უარს ამბობს ჩვენს მომსახურებაზე, მან მოხსნა ადვოკატები და მიიჩნევს, რომ საქართველოში, მის წინააღმდეგ პოლიტიკური დევნა მიმდინარეობს და ამაში ჩართული არიან უკრაინის სამართალდამცავი ორგანოები.
ასევე, თვლის, რომ მიმდინარეობს მის წინააღმდეგ პოლიტიკური დევნა უკრაინაშიც. შესაბამისად, მას ამ სასამართლოს შემადგენლობის მიმართ უნდობლობა აქვს.
პროცესი გაგრძელდება იმ გეგმის მიხედვით, რასაც სასამართლო გადაწყვეტს. გუშინ ლუცენკომ გააკეთა განცხადება, რომ ახალ წლამდე უნდა მოხდეს საააკაშვილის საქართველოში ექსტრადირება, თუკი ის თავის ნებით არ დატოვებს უკრაინის ტერიტორიას.
ბოლო პერიოდში, ამ სისხლის სამართლის საქმის განხილვა დაჩქარებულ რეჟიმში მიმდინარეობს. მოსამართლემ პროცესი ხვალისთვის დანიშნა, ეს ადასტურებს სააკაშვილის ეჭვებს, პოლიტიკურ მართლმსაჯულებასთან დაკავშირებით.
ბუნებრივია, ერთ დღეში არ წყდება სახაზინო ადვოკატის დანიშვნა, ეს პროცესები დაჩქარებულია და ემსახურება იმ მიზანს, რომ სააკაშვილის ექსტრადირება მოხდეს და მის მიმართ პოლიტიკური დევნა გაგრძელდეს და მას პრობლემები შეუქმნან, პროცესის ხვალ ჩანიშვნაც ამას ადასტურებს“, - განმარტა კაკოიშვილმა.
ცნობისთვის, დღეს, თბილისის საქალაქო სასამართლოში, მიხეილ სააკაშვილის ადვოკატებს დასკვნითი სიტყვა უნდა წარმოეთქვათ, თუმცა 12 დეკემბრის გადაწყვეტილებით მან ადვოკატები აიცილა.
მოსამართლემ მომდევნო პროცესი 14 დეკემბერს ჩანიშნა, თუმცა ჯერჯერობით უცნობია, ხვალვე ეყოლება თუ არა სააკაშვილს სახაზინო ადვოკატები.
შეგახსენებთ, სააკაშვილს ბრალდების მხარე გირგვლიანის მკვლელობის საქმეში სამსახურებრივი უფლებამოსილების ბოროტად გამოყენებას ედავება.
პროკურატურის ბრალდების თანახმად, სააკაშვილის მხრიდან მოხდა დანაშაულის დაფარვა, გამოძიების გაყალბება, დანაშაულში ჩართული მაღალი თანამდებობის პირებისთვის ხელის დაფარება და მათთვის პასუხისმგებლობის თავიდან არიდება.