საქართველოში აშშ-ის ელჩი იან კელი, საქართველოს ყოფილი პრეზიდენტის, ოდესის ყოფილი გუბერნატორ, მიხეილ სააკაშვილთან დაკავშირებით განვითარებულ მოვლენებს ეხმაურება. მისი თქმით, აშშ ყურადღებით აკვირდება მიმდინარე მოვლენებს.
"ჩვენ ყურადღებით ვაკვირდებით ამ საკითხს, ყურადღებით აკვირდება ამერიკის სახელმწიფო დეპარტამენტი და ჩემი კოლეგა უკრაინაში. მთავარი ამ საკითხში არის ის, რომ სამართლიანი სამართლებრივი პროცესი წარიმართოს და ყველა ამას დააკვირდება," - განაცხადა იან კელიმ.
აშშ-ის ელჩი მიხეილ სააკაშვილის ირგვლივ განვითარებული პროცესების საქართველოსთან კავშირზეც საუბრობს.
"რაც შეეხება ამ მოვლენების ასახვას საქართველოზე, ის არის საქართველოს ყოფილი მეთაური. ჩვენი ინტერესია საქართველოს დავეხმაროთ წინ წავიდეს, განვითარდეს და გახდეს უფრო წარმატებული. ძალიან გვიხარია, რომ საქართველო ფოკუსირებულია მომავალზე," - აცხადებს იან კელი.