მთავრობის სტრუქტურულ რეორგანიზაციასთან დაკავშირებული საკანონმდებლო ცვლილებები პარლამენტმა მესამე მოსმენით, 86-ხმით დაამტკიცა.
99 - კანონპროექტისგან შემდგარი საკანონმდებლო პაკეტის თანახმად, რამდენიმე სამინისტროს შერწყმა-გაერთიანება ხდება. კერძოდ, განათლებისა და მეცნიერების სამინისტროს სპორტისა და ახალგაზრდობის სამინისტროს ახალგაზრდობის კომპონენტი უერთდება, ხოლო სპორტის ნაწილი კულტურის სამინისტროს ფარგლებში გადადის. გარემოს დაცვის სამინისტრო სოფლის მეურნეობის სამინისტროს უერთდება. ეკონომიკის და მდგრადი განვითარების სამინისტროში ენერგეტიკის სამინისტრო ერთიანდება. ასევე ეკონომიკის სამინისტროში შედის გარემოს დაცვისა და ბუნებრივი რესურსების სამინისტროს ბუნებრივი რესურსების კომპონენტი.
ცვლილებებით, ასევე გაუქმდა უსაფრთხოებისა და კრიზისების მართვის საბჭო. პრემიერ-მინისტრის უშუალო დაქვემდებარებაში კი, სპეციალური დანიშნულების სახელმწიფო დაწესებულება - საგანგებო სიტუაციების მართვის სამსახური იქმნება.
გარდა ამისა, პრემიერ-მინისტრის გადაწყვეტილებით, მთავრობის ფარგლებში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატი აღარ იარსებებს.
ახალმიღებული კანონების გამოქვეყნებისა და ამოქმედებისთანავე, ახალი სტუქტურების შესაბამისად მინისტრები დაინიშნებიან, რასაც შემდგომი პროცესი - პარლამენტის მიერ მთავრობისათვის ნდობის გამოცხადება მოჰყვება.
