"საერთოდ არ მიკვირს რომ დეკანოზ გიორგი მამალაძეს, როგორც მოქალაქეს, სასამართლოს მიმართ ნდობა არ გააჩნია", - ამის შესახებ ე.ც ციანიდს საქმეზე მსჯავრდებული დეკანოზ გიორგი მამალაძის ადვოკატმა დღევანდელი პროცესის დასრულების შემდეგ განაცხადა.
ადვოკატის თქმით, სხდომაზე შუამდგომლობები იყო დაყენებული, რომლის მოსმენაზეც ჟურნალისტები არ დაასწრეს:
"ამ შუამდგომლობაში, თურმე ახალი გარემოება ყოფილა ის, რომ ჩემ მიმართ დაიწყო გამოძიება, რომელიც ჩემზე განხორციელებულ მუქარის ფაქტს ეხებოდა. ასევე, დაახლოებით, 18 დღის წინ, ჩემ მიმართ განხორციელდა არასასიამოვნო მოქმედება. თითქოს, ამასთან დაკავშირებით მიფრთხილდებიან და ამ შუამდგომლობის განხილვაზე ჟურნალისტები არ დაასწრეს. რეალურად კი საქმე სხვა რამეშია - იმ ფაქტიდან 18 დღეა გასული და დღემდე დაზარალებულის სტატუსი არ მაქვს მინიჭებული. რაც შეეხება მუქარის ფაქტს, რომელიც 6 დღის წინ განხორციელდა ამასთან დაკავშირებით, პოლიციაში გუშინაც ვიყავი მისული და ერთი საპროცესო მოქმედებაც კი არ არის ჩატარებული. ეს ყველაფერი მაფიქრებინებს: ჩემ მიმართ განხორციელებული ეს მოქმედებები იქიდან ხომ არ იყო გამოწვეული, რომ დღეს, ბრალდების მხარეს დახურვის საფუძველი ჰქონოდა"? - განაცხადა ადვოკატმა გიორგი ფანცულაიამ.
თბილისის სააპელაციო სასამართლოში ე.წ. ციანიდის საქმის განხილვა 20 დეკემბერს ჩაინიშნა. პროცესი მხარეების შუამდგომლობით განახლდება.
სასამართლოს გადაწყვეტილებით, მომდევნო პროცესები დახურულ რეჟიმში გაგრძელდება.