"უპირველეს ყოვლისა, მადლობა ყველა გულშემატკივარს, განსაკუთრებული მადლობა ადვოკატებს, ასევე ჟურნალისტებს. მადლიერებას გამოვხატავ სახალხო დამცველის და პროფესორ ნანა თოდუას მიმართ. არ შემიძლია ხელისუფლების და საპატრიარქოს უპასუხისმგებლო განცხადებებზე გულისტკივილი არ გამოვთქვა. მტკიცებულება არ არსებობს, რომ ვინმეს მოკვლას ვაპირებდი. ბრალდება ამტკიცებს რომ მქონდა ციანიდი, რომელიც ჩანთაში აღმოაჩინეს , ეს ავადსახსენბელი ნივთიერება არ მქონია, თუმცა არ უარვყოფ, რომ ამ ნივთიერებით დაინტერესებული ვიყავი, ოღონდ შორენა თეთრუაშვილის დავალებით და სამწუხაროა, რომ მან ეს უარყო", - განაცხადა მამალაძემ რაზეც მოსამართლემ უპასუხა, რომ დეკანოზის სიტყვა ფაქტობრივ გარემოებებს ეხებოდა, რის გამოც მას სიტყვა შეაწყვეტინა. თუმცა, ბრალდებულმა განაცხადა, რომ მისი სიტყვა იყო ბრალდების მხარის დაყენებულ შუამდგომლობაზე პასუხი.
"ამოღებულ ციანიდზე პროკურატურამ ექსპერტიზა არ ჩაატარა, სამაგიეროდ, ფარატინა ქაღალდზე ჩაატარა, სადაც კალიუმის ციანიდი ეწერა...13 თებერვალს მთავარმა პროკურორმა შოთაძემ საზოგადოების წინასწარი აზრის შექმნისთვის, მიანიშნა, თითქოს პატრიარქის მკვლელობა იგეგმებოდა...ჩემივე ადვოკატების თანდასწრებით, მიტროპოლიტ დიმიტრისა და იოსებ ოხანაშვილის მკვლელობაში მონაწილეობის აღიარებას მთხოვდნენ- თავისუფლების სანაცვლოდ, თავს დაესხნენ ჩემს ძმას, ადვოკატები დაიბარეს პროკურატურასა და სასამართლოში", - განმარტა დეკანოზმა პროცესის დატოვებამდე.
შეგახსენებთ, ე.წ ციანიდის საქმეზე მსჯავრდებულმა, დეკანოზმა გიორგი მამალაძემ, პროტესტის ნიშნად, სასამართლო დარბაზი დატოვა.
პროცესზე ბრალდების მხარემ სხდომების დახურვასთან დაკავშირებით დააყენა შუამდგომლობა, რასაც დაცვის მხარე არ დაეთანხმა.
შეგახსენებთ, დეკანოზ გიორგი მამალაძეს თბილისის საქალაქო სასამართლომ 5 სექტემბერს, 9 წლით თავისუფლების აღკვეთა მიუსაჯა.
