„პროკურორი ფაქტებს ამახინჯებს და ისე გადმოსცემს“, - განუცხადა „ჯი-ეიჩ-ენს“ ჰიპერმარკეტ „გორგიას“ მფლობელის, გია გორგოშაძის გატაცებისა და ფულის გამოძალვის მცდელობის ფაქტზე ბრალდებულების ადვოკატმა, თამარ აბესაძემ.
დღეს, თბილისის საქალაქო სასამართლომ აღნიშნულ საქმეზე პროკურატურის მიერ მოპოვებული ყველა მტკიცებულება დასაშვებად ცნო.
დაცვის მხარე განმარტავს, რომ ბრალდების მხარემ ყველა მტკიცებულება პროცესუალური დარღვევებით მოიპოვა, პროკურორი კი აცხადებს, რომ ვიდეომტკიცებულება წარადგინეს, რომელშიც ჩანს, თუ როგორ გადაადგილდება პარიკით ერთ-ერთი ბრალდებული.
„პროკურორმა ისეთი მტკიცებულების გაჟღერებისგან, რომელიც არ გამოკვლეულა, თავი უნდა შეიკავოს. დღეს სასამართლომ ბრალდების მხარე ფაქტობრივად წაახალისა. ბრალდების მხარეს შეუძლია პროცესუალური დარღვევებით მოპოვებული მტკიცებულებები სასამართლოში მოიტანოს და მოსამართლე დაუკანონებს.
ბრალდებულს, რომელიც გამოკითხულია, ხელი მოწერილი არ აქვს, სასამართლომ ეს მაინც დასაშვებ მტკიცებულებად ცნო. პირადი ჩხრეკის დროს იარაღის ამოღების ოქმზე, თავად პოლიციის თანამშრომლებს არ აქვთ ხელი მოწერილი. შეიძლება ეს დასაშვები მტკიცებულება იყოს? ადვოკატი ვარ და მე არ ვიკადრებ საზოგადოებისთვის ასეთი აბსურდის მოყოლას“, - აცხადებს აბესაძე.
ადვოკატი დასძენს, რომ აღნიშნული მტკიცებულებების დასაშვებად ცნობას ბრალდების მხარეც კი არ ელოდა.
გამოძიების ვერსიით, 2017 წლის ოქტომბერს, ბრალდებულებმა ბაგებში, გორგოშაძის მეზობლად ბინა იქირავეს, საიდანაც დაზარალებულს უთვალთვალებდნენ და მის გატაცებას გეგმავდნენ. სახლიდან ამოღებულია პირბადები, ელექტროშოკი, პარიკი, იარაღი და დანაშაულისთვის საჭირო სხვა ნივთები.
სამართალდამცავებმა 4 ბრალდებული დანაშაულის ჩადენამდე, 11 ოქტომბერს დააკავეს.