"ხელისუფლებისგან ველით ინფორმაციას, რასთან გვაქვს საქმე, - ამის შესახებ "ევროპული საქართველოს" ლიდერმა გიგა ბოკერიამ თბილისში მიმდინარე სპეცოპერაციასთან დაკავშირებით განაცხადა.
მისი თქმით, ეს სერიოზული ამბავია და საზოგადოებას აქვს უფლება იცოდეს რასთან გვაქვს საქმე.
"არ ვფლობთ ინფორმაციას რომ ახლა დასკვნები გავაკეთოთ, მით უმეტეს სპეცოპერაცია მიმდინარეობს. პირველ რიგში გამოჯანმრთელება უნდა ვუსურვოთ დაჭრილ სპეცრაზმელს და იმედი ვიქონიოთ, რომ სწრაფად დასრულდება სპეცოპერაცია, მსხვერპლის გარეშე. შემდეგ ველით ინფორმაციას ხელისუფლებისგან, ეს სერიოზული ამბავია და საზოგადოებას აქვს უფლება იცოდეს რასთან გვაქვს საქმე", - განაცხადა ბოკერიამ.
ცნობისთვის, გაბრიელ სალოსის გამზირზე სპეცოპერაცია მიმდინარეობს. ადგილზე სროლის ხმა ისმის. ტერიტორიაზე რამდენიმე წუთის წინ სახანძრო მანქანა შევიდა. ადგილიდან დაჭრილი სპეცრაზმელი გაიყვანეს.
შეგახსენებთ, ბერი გაბრიელ სალოსის ქუჩაზე გვიან ღამიდან მოყოლებული, სპეცოპერაცია მიმდინარეობს.
ადგილზე რჩება საპატრულო პოლიციის რამდენიმე ეკიპაჟი. სამართალდამცავების ნაწილი იმ კორპუსის მეორე სართულზე იმყოფება, სადაც სპეცოპერაცია მიმდინარეობს.
არსებული ინფორმაციით, 46 კორპუსის მე-3 სართულზე შეიარაღებული პირები იმყოფებიან, სადაც მათი აყვანის ოპერაცია მიმდინარეობს.
