ვხედავ, რომ სიმშვიდეა, – ამის შესახებ საპარლამენტო უმრავლესობის წევრმა ბექა ნაცვლიშვილმა განაცხადა, რომელიც ბერი გაბრიელ სალოსის ქუჩაზე მივიდა, სადაც სპეცოპერაცია მიმდინარეობს.
როგორც ნაცვლიშვილმა აღნიშნა, სპეცოპერაციის მიმდინარეობის დეტალები მისთვის ცნობილი არ არის.
“მოვედი აქ რომ მენახა, როგორი სიტუაციაა. ჩემი ინტერესი იყო დავრწმუნებულიყავი, რომ მოსახლეობა ტერიტორიიდან გაყვანილი იყო. ვხედავ, რომ სიმშვიდეა. სპეცოპერაცია მიმდინარეობს და დეტალებზე კომენტარს სამართალდამცველები გააკეთებენ”, – განაცხადა ბექა ნაცვლიშვილმა.
ცნობისთვის, ადგილზე სროლის ხმა ისმის. ტერიტორიაზე რამდენიმე წუთის წინ სახანძრო მანქანა შევიდა. ადგილიდან დაჭრილი სპეცრაზმელი გაიყვანეს.
შეგახსენებთ, ბერი გაბრიელ სალოსის ქუჩაზე გვიან ღამიდან მოყოლებული, სპეცოპერაცია მიმდინარეობს.
ადგილზე რჩება საპატრულო პოლიციის რამდენიმე ეკიპაჟი. სამართალდამცავების ნაწილი იმ კორპუსის მეორე სართულზე იმყოფება, სადაც სპეცოპერაცია მიმდინარეობს.
არსებული ინფორმაციით, 46 კორპუსის მე-3 სართულზე შეიარაღებული პირები იმყოფებიან, სადაც მათი აყვანის ოპერაცია მიმდინარეობს. ანტიტერორისტული ოპერაცია უკვე 15 საათზე მეტია გრძელდება.