მოწინააღმდეგემ უნდა იცოდეს, რომ საქართველოს შეუძლია ადეკვატური წინააღმდეგობის გაწევა, - ამის შესახებ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა ჯავშანსაწინააღმდეგო სარაკეტო სისტემა Javelin-ის ყიდვასთან დაკავშირებით განაცხადა.
მისი თქმით, ეს, ყველაფერთან ერთად, აღიარებაა ჩვენი ქვეყნის სანდოობის, საიმედო პარტნიორობის.
,,ეს არის ჩვენი ქვეყნის დემოკრატიულობის აღიარება, რაც ემსახურება ჩვენს ქვეყანაში, რეგიონში მშვიდობას და უსაფრთხოებას. ჩვენი სუვერენული უფლებაა უზრუნველვყოთ ჩვენ ქვეყნის დამოუკიდებლობა. ეს არის ერთ-ერთი თანამედროვე, ეფექტური ტანკსაწინააღმდეგო სისტემა, რაც ჩვენი ქვეყნისთვის არის ხერხემალი. ნებისმიერი ცივილიზებული სახელმწიფო ამ პროცეს შეაფასებს სწორ გადაწყვეტილებად, რომელიც ხმარდება მშვიდობასა და უსაფრთხოებას. გასაგებია, რომ რუსეთის აღშფოთება დაკავშირებული იქნება მის აგრესიულ პოლიტიკასთან. იმდენად რანდენადაც მას არ აწყობს ძლიერი და მშვიდობიანი რეგიონები მეზობლად. ეს არის პრევენციული საშუალებაა იმისათვის, რომ მოწინააღმდეგემ იცოდეს - საქართველოს შეუძლია ადეკვატური წინააღმდეგობა გაუწიოს ქვეყნაზე თავდასხმის შემთხვევაში", - აღნიშნა სესიაშვილმა.
აშშ-ის სახელმწიფო დეპარტამენტმა საქართველოსთვის ანტისატანკო სარაკეტო კომპლექსების Javelin-ის გადაცემის გადაწყვეტილებას მხარი დაუჭირა. საუბარია ტექნიკაზე, რომლის ღირებულებაც 75 მილიონ დოლარს აღწევს. ინფორმაციას აშშ-ის თავდაცვის სამინისტროს დაქვემდებარებაში მყოფი თავდაცვისა და უსაფრთხოების თანამშრომლობის სააგენტო ავრცელებს.
„საქართველოს მთავრობამ მოითხოვა ანტისარაკეტო კომპლექს Javelin-ის 410 რაკეტის, 72 სამიზნე-გამშვები ბლოკის, 10 სასწავლო კომპლექსისა და 70 ჭურვის შეძენა.
ამასთან, აშშ-ის მთავრობა მზადაა, საქართველოში ტექნიკის ტრანსპორტირება და მისი ტექნიკური მომსახურება უზრუნველყოს“, – ნათქვამია პრესრელიზში.