თბილისის ოლიმპიურ სასახლეში საბავშვო ევროვიზიის კონკურსთან დაკავშირებით პრესკონფერენცია გაიმართა. მასშტაბური საერთაშორისო ღონისძიების ბოლო დეტალების და დასკვნითი სამუშაოების შესახებ ინფორმაცია საზოგადოებას ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ, 2017 წლის საბავშვო ევროვიზიის სიმღერის კონკურსის აღმასრულებელმა პროდიუსერმა სერგი გვარჯალაძემ, საზოგადოებრივი მაუწყებლის მედიის და კომუნიკაციების დირექტორმა თინათინ ბერძენიშვილმა, კონკურსის კრეატიულმა რეჟისორმა – გორდონ ბონელომ და შოუს წამყვანებმა: ლიზი ჯაფარიძემ და ელენე კალანდაძემ მიაწოდეს.
პრესკონფერენციის შემდეგ ჟურნალისტებმა ორგანიზატორებთან ერთად საკონცერტო დარბაზი დაათვალიერეს და მიმდინარე სამუშაოებს გაეცნენ.
საბავშვო ევროვიზიის კონკურსის ჩატარების მნიშვნელობაზე საუბრობს ტურიზმის ეროვნული ადმინისტრაციის ხემძღვანელი გიორგი ჩოგოვაძე:
„საბავშვო ევროვიზიის საქართველოში გამართვით ჩვენ მსოფლიოს კიდევ ერთხელ ვეუბნებით, თუ როგორი საინტერესო და უსაფრთხო ქვეყანა ვართ. კონკურსი ტარდება პროექტ „Check in Georgia-ს“ ფარგლებში. თვითონ პროექტი ითვალისწინებს და ემსახურება ჩვენი ქვეყნის ცნობადობის ამაღლებას და პოპულარიზაციის გაზრდას მსოფლიო მასშტაბით. ამ შოუს პირდაპირი ტრანსლირება მოხდება 20 ქვეყანაში. როგორც იცით 2016 წელს ჩვენ მე-6 მილიონე საერთაშორისო მოგზაურს დავხვდით, და 2017 წლის ბოლოს უკვე დანამდვილებით შეგვიძლია ვთქვათ, რომ მეშვიდემილიონ საერთაშორისო მოგზაურს მივიღებთ.“– განაცხადა გიორგი ჩოგოვაძემ.
ღონისძიების დეტალების შესახებ ისაუბრა საბავშვო ევროვიზიის სიმღერის კონკურსის აღმასრულებელმა პროდიუსერმა სერგი გვარჯალაძემ: “ეს არის მე-15, საიუბილეო საბავშვო ევროვიზია, ამ ღონისძიებაში 16 სახელმწიფო მონაწილეობს. სატელევიზიო ტრანსლაცია ოცამდე ქვეყანაში განხორციელდება. პროგრამა ოფიციალურად 20 ნოემბრიდან იწყება, ამ პერიოდში ჩამოვლნენ კონკურსის მონაწილე ბავშვები და დელეგაციები. დაგეგმილია სხვადასხვა ღონისძიება, მათ შორის სოციალური ხასიათის. 25 ნოემბერს გაიმართება გენერალური რეპეტიცია. ბილეთების შეძენა შესაძლებელია ონლაინ რეჟიმში. ბილეთები იყიდება ეტაპობრივად. ამ ღონისძიებაზე არ იქნება მოსაწვევები. სულ 2500 ადამიანი ეტევა დარბაზში. დარწმუნებული ვარ დიდი ინტერესი იქნება.“ განაცხადა სერგი გვარჯალაძემ.
