თბილისის მერმა კახა კალაძემ დედაქალაქის რაიონების გამგებლები წარადგინა. დედაქალაქის მერის განცხადებით, ეს ადამიანები გახდებიან ქალაქის მთავრობის მთავარი დასაყრდენი თბილისის რაიონებსა და უბნებში.
„გამგებლები და გამგეობები ასრულებენ უმნიშვნელოვანეს როლს, კონკრეტული რაიონების, კონკრეტული პრობლემების მოგვარებაში. გამგებლებს ყოველდღიური შეხება აქვთ მოქალაქეებთან, მათ პრობლემებთან და ყველაფერი უნდა გაკეთდეს, რომ იმუშაონ ეფექტურად არსებული გამოწვევების დაძლევის მიზნით“, - აღნიშნა კალაძემ.
დედაქალაქის რაიონების გამგებლების ახალი შემადგენლობა ასეთია:
საბურთალოს რაიონი - გაიოზ ვასაძე
ვაკის რაიონი - ნოდარ ტურძელაძე
ჩუღურეთის რაიონი - ზურაბ ჩიკვილაძე
დიდუბის რაიონი - ირმა ზავრადაშვილი
ნაძალადევის რაიონი - ირაკლი ხელაძე
გლდანის რაიონი - ბექა მიქაუტაძე
კრწანისის რაიონი - ლევან ჯაფარიძე
მთაწმინდის რაიონი - დავით კირკიტაძე
ისნის რაიონი - კახა ლაბუჩიძე
სამგორის რაიონი - დავით კერესელიძე
თბილისი მერის თქმით, გამგებლებს ექნებათ მისგან მაქსიმალური მხარდაჭერა და ყველა წინაპირობა საქმის კეთებისათვის, თუმცა, ამავდროულად იგი იქნება ძალიან მომთხოვნი თითოეული მათგანისადმი და არ დაუშვებს მოქალაქეებისა და ქალაქის პრობლემებისადმი გულგრილ დამოკიდებულებას.
ბრიფინგის დასასრულს კახა კალაძემ გამგებლებს თბილისელებისთვის მიცემული დაპირებების შესრულებასა და მომავალ საქმიანობაში წარმატება უსურვა.