კანონპროექტის განხილვის დადგენილი ვადები შესაძლოა გაიზარდოს. აღნიშნულ ინიციატივას „საქართველოს პარლამენტის რეგლამენტში“ შესატანი ცვლილებების კანონპროექტი ითვალისწინებს, რომელიც საპროცედურო საკითხთა და წესების კომიტეტზე, საკითხის ერთ-ერთმა ინიციატორმა, პარლამენტის წევრმა ლევან კობერიძემ წარმოადგინა.
მომხსენებლის ინფორმაციით, ცვლილებების მომზადების მიზეზი კანონპროექტების განხილვაში ყველა მიზნობრივი ჯგუფის ჩართვა წარმოადგენს, რაც გარკვეულ დროსთან არის დაკავშირებული. მისი მოსაზრებით, ვადების გახანგრძლივება თვისობრივად გააუმჯობესებს კანონპროექტის განხილვის შინაარსობრივ მხარეს და სამუშაო პირობებს. რაც შეეხება უშუალოდ ცვლილებებს - წამყვანი კომიტეტისთვის დადგენილი განხილვის ვადა ნაცვლად 3 კვირისა 30 სამუშაო დღემდე იზრდება. რაც შეეხება დაჩქარებული წესით კანონპროექტის განხილვის წესს - წარმოდგენილი ცვლილებებით, პარლამენტის სასესიო პერიოდის დასრულებამდე 10 დღით ადრე მათი მიღება შეუძლებელი იქნება.
გიორგი კახიანს, კანონპროექტების განხილვის დაჩქარებული წესის ცვლილება პრინციპების დონეზეც კი მიუღებლად მიაჩნია.
საკითხთან დაკავშირებით კომიტეტის სხდომაზე დეპუტატებმა მოსაზრებები გამოთქვეს. გამომსვლელები კანონპროექტის განხილვის ვადის გაგრძელების ცვლილებას პრინციპების დონეზე დაეთანხმნენ, თუმცა უშუალოდ ვადებზე განსხვავებული პოზიციები დააფიქსირეს.
კომიტეტის თავმჯდომარის, გიორგი კახიანის განცხადებით, წამყვანი კომიტეტისთვის კანონპროექტის განხილვის ვადის 30 სამუშაო დღემდე გაგრძელება ფაქტიურად 6 კვირას მოიცავს, რაც საკმაოდ დიდი ვადაა და გარკვეულ რისკებს შეიცავს. მისი მოსაზრებით, შესაძლოა აღნიშნული ვადა კომიტეტებმა ბოლომდე გამოიყენონ და ისეთი კანონპროექტები, რომლებიც მხოლოდ ერთი პუნქტის ცვლილებას საჭიროებენ, ხანგრძლივი ვადით გადაიდოს და მათი დროულად განხილვა ვერ მოხერხდეს.
კომიტეტის წევრების მიერ გამოთქმული შენიშვნების გათვალისწინებით, კომიტეტმა პრინციპების დონეზე, კანონპროექტის პლენარულ სხდომაზე გატანას მხარი დაუჭირა.
