გორის რაიონულ სასამართლოში ხვალ, 15:00 საათზე ბექა ხახუბიას გარდაცვალების საქმესთან დაკავშირებით სასამართლო პროცესი გაიმართება. ხვალ სასამართლო ბრალდების მოწმეებს მოუსმენს.
როგორც ბრალდებული სამართალდამცავების ადვოკატი, ნოდარ ცინცაძე „ჯი-ეიჩ-ენთან“ აცხადებს, გამოკვლეული მტკიცებულებებით, მისი დაცვის ქვეშ მყოფების ბრალეულობა არ დასტურდება.
„ბრალდების რომელ მოწმეებს დაკითხავენ ხვალ, ეს ჩვენთვისაც არაა ცნობილი, ამას პროცესზე გავიგებთ. მოწმეთა ჩვენებებით, იკვეთება რომ სატვირთო მანქანა ისე იყო დაყენებული, იქ მანქანის გასასვლელი დარჩენილი იყო. იმ მტკიცებულებებით, რაც სასამართლოში გამოკვლეული იქნა, სამართალდამცავების ბრალდება არ დასტურდება“, - აცხადებს ნოდარ ცინცაძე.
შეგახსენებთ, რომ 21 წლის ბექა ხახუბია გორის გვირაბთან ავტოსაგზაოშემთხვევის დროს დაიღუპა. ის გადაჭარბებული სიჩქარით ნასვამ მდგომარეობაში მართავდა მანქანას და პატრულის მითითებას არ დაემორჩილა, რა დროსაც განხორციელდა მისი დევნა. გორის გვირაბის გასასვლელთან პატრულის თანამშრომლებმა გზა ტრაილერით ჩაკეტეს, რომლის წინ რამდენიმე მეტრში ევაკუატორი დააყენეს. დიდი სიჩქარით მოძრავი ბექა ხახუბია ჯერ ევაკუატორს დაეჯახა, შემდეგ კი ტრაილერს. ის ადგილზე გარდაიცვალა.
აღნიშნულთან დაკავშირებით, სამი პოლიციელია ბრალდებული.