„ადამიანთა რაოდენობის მხრივ, ციფრებზე სასაუბროდ ბუნებრივია მზად არ ვარ, რადგან ჯერ უნდა ჩამოვაყალიბოთ, როგორც სტრუქტურა, ისე ოპტიმალური საშტატო განრიგი“, - ამის შესახებ კულტურისა და ძეგლთა დაცვის მინისტრმა, მიხეილ გიორგაძემ სპორტისა და ახალგაზრდობის სამინისტროს სპორტის კომპონენტის კულტურის სამინისტროსთვის შეერთების საკითხის კომენტირებისას განაცხადა.
როგორც მინისტრმა აღნიშნა, ჯერჯერობით დასაქმებულებს ორ შენობაში მოუწევთ მუშაობა.
„პირველ ხანებში, მოგვიწევს ორ შენობაში გადანაწილება, თუმცა იდეალური იქნებოდა ერთ შენობაში განთავსება, ელემენტარულად, კომუნიკაციისა და კარგი სამუშაო ატმოსეროს შექმნისთვის.
რაც შეეხება ბიუჯეტს, რომელიც იყო გამოყოფილი, ერთმნიშვნელოვნად შემცირდება. ასევე, გარდაუვალია შტატების შემცირება და ეს, დიდწილად, ადმინისტრაციულ ნაწილზე მოვა“, - განაცხადა მიხეილ გიორგაძემ.
შეგახსენებთ, საქართველოს პრემიერ-მინისტრის, გიორგი კვირიკაშვილის განცხადებით, სპორტისა და ახალგაზრდობის საქმეთა სამინისტრო უქმდება. როგორც კვირიკაშვილმა მთავრობის ადმინისტრაციაში გამართულ ბრიფინგზე განაცხადა, სამინისტრის სპორტის კომპონენტი კულტურის სამინისტროს შეუერთდება, ახალგაზრდობის საქმეთა კომპონენტი კი - განათლებას.
