რადიო „ეხო მოსკვის“ ჟურნალისტზე თავდამსხმელი საქართველოში დაბადებული, ისრაელის მოქალაქეა, - ამის შესახებ ინფორმაციას „რია-ნოვოსტი“ საკუთარ წყაროზე დაყრდნობით ავრცელებს.
რუსმა სამართალდამცველებმა გაავრცელეს ვიდეო, რომელშიც დაკავებული ამბობს, რომ მას ჰქვია ბორის გრიცი და დაზარალებულს „ტელე-პოლიტიკური“ კონტაქტით იცნობს.
აღსანიშნავია, რომ მას არ გააჩნია დოკუმენტები და სამართალდამცველები ვინაობის დადგენას ცდილობენ.
ამასთანავე, დაკავებული აცხადებს, რომ ორი თვის განმავლობაში ჟურნალისტი მას ავიწროებდა „ტელე-პოლიტიკური“ კონტაქტის მეშვეობით.
შეგახსენებთ, რადიო „ეხო მოსკვის“ ოფისში დანით შეიარაღებული მამაკაცი შეიჭრა და წამყვანი ტატიანა ფელგენგაუერი დაჭრა. წამყვანი დანით ყელის არეშია დაჭრილი. ექიმების თქმით, მის სიცოცხლეს საფრთხე არ ემუქრება.