თბილისის საკრებულოსთან „ერთიანი ნაციონალური მოძრაობის“ აქციის დროს დაკავებულების სასამართლო პროცესი კიდევ ერთხელ გადაიდო.
ბრალდების მხარის შუამდგომლობით, პროცესი 27 ოქტომბერს გაიმართება, რადგან მათი თქმით, არ ჰქონდათ საკმარისი დრო რათა აქციის ამსახველი ვიდეო მასალები გაეანალიზებინათ, ასევე ვერ მოხდა ტელევიზიების მიერ ვიდეო მასალების სრულად გადაცემა ბრალდებისთვის.
დაცვის მხარე კი მოითხოვდა სასამართლო სხდომა 21 ოქტომბრამდე გამართულიყო, რადგან ბრალდებულთა შორის 6 მაჟორიტარობის კანდიდატი და ერთი მერობის კანდიდატია.
„პროკურატურამ ვერ შეძლო ტელევიზიებიდან ამოღებული 2 საათიანი მასალის გაშიფრვა თავიანთი განმარტებით. მე როგორც თავიდანვე ვაცხადებდი, აქ არაფერ შუაში არ არის 2 საათიანი მასალა, მათ სჭირდებოდათ, რომ „ნაციონალური მოძრაობის“ მაჟორიტარობის კანდიდატები ყოფილიყვნენ დამძიმებულები საარჩევნოდ და არ გამართლებულიყვნენ არჩევნებამდე. მოსამართლემ სამწუხაროდ, დაუკმაყოფილა ყოველგვარი დასაბუთების გარეშე მოთხოვნა და მონაწილეობა მიიღო ფაქტობრივად საარჩევნო პროცესში. დაეხმარა „ქართულ ოცნებას“ „ერთიანი ნაციონალური მოძრაობის“ წინააღმდეგ,“ - განაცხადა ადვოკატმა გოგა ონიანმა.