ჩვენ ვტოვებთ ძალიან დახვეწილ კონსტიტუციას, რომელიც ძალიან დიდი ხნის განმავლობაში უზრუნველყოფს ჩვენი ქვეყნის დემოკრატიულ განვითარებას, - ამის შესახებ საქართველოს პარლამენტის თავმჯდომარე ირაკლი კობახიძემ რიგგარეშე სხდომის დასრულების შემდეგ განაცხადა.
მისი თქმით, როგორც კი ხელი მოეწერება დოკუმენტს, მაშინვე მოხდება იმ საკითხების ინიცირება, რომელიც აისახა ვენეციის კომისიის ბოლო დასკვნაში.
„ჩვენ დღეს მივიღეთ ძალიან დახვეწილი დოკუმენტი. მუდმივად პრობლემა იყო კონსტიტუციის გაუმართაობა. ჩვენ დაუხვეწავი დოკუმენტი შევცვალეთ დახვეწილი დოკუმენტით, რომლითაც, როგორც ვენეციის, ასევე სხვა საერთაშორისო ორგანიზაციებმა აღნიშნეს, რომ ყალიბდება ძალიან დახვეწილი ევროპული ტიპის საპარლამენტო მმართველობის სისტემა. ეს არის ძალიან დიდი მიღწევა, ეს არის ისტორიული გადაწყვეტილება, ეს არის ამომრჩევლისთვის მიცემული დაპირება ჩვენი მხრიდან და ჩვენ ეს დანაპირები პირნათლად შევასრულეთ. ჩვენ ვტოვებთ ძალიან დახვეწილ კონსტიტუციას, რომელიც ძალიან დიდი ხნის განმავლობაში უზრუნველყოფს ჩვენი ქვეყნის დემოკრატიულ განვითარებას“, - განაცხადა ირაკლი კობახიძემ.