საპატრიარქოში გამართულ წმინდა სინოდის სხდომაზე გადაწყდა, რომ სპეციალური საჭო შეიქმნება, რომელიც ე.წ. ციანიდის საქმეს და დეკანოზ გიორგი მამალაძის საკითხს შეისწავლის. ამასთან დაკავშირებით, „ჯი-ეიჩ-ენთან“ კომენტარი დეკანოზის ადვოკატმა, პაატა მეხრიშვილმა გააკეთა. ის აღნიშნულ ფაქტს დადებითად აფასებს.
„თავის მნიშვნელობით ეს ნამდვილად პოზიტიური გადაწყვეტილებაა. როგორც ვიცი, ისინი ორივე ინსტანციის გადაწყვეტილებას დაელოდებიან და მხოლოდ ამის შემდეგ შეისწავლიან საქმეს. ეს სასამართლოს გადაწყვეტილებას ვერ ჩაანაცვლებს, მაგრამ ის რომ ამ საქმესთან დაკავშრებით საპატრიარქო რაღაც გადაწყვეტილებას მიიღებს, პოზიტიური მოვლენაა“, - აცხადებს მეხრიშვილი
როგორც ადვოკატი აღნიშნავს, ეს ფაქტი სინოდის მხრიდან პროკურატურის მიმართ უნდობლობის გამოცხადებას არ ნიშნავს.
„ეს პროკურატურის ნდობა-არნდობის საკითხთან კავშირში არ არის. მათ თავიანთი საეკლესიო კანონით უნდა მიიღონ მამა გიორგის მიმართ ის გადაწყვეტილება, რომელიც ადეკვატური და სწორი იქნება. სინოდის გადაწყვეტილებას წინასწარ უნდობლობას ვერ გამოვუცხადებ. სინოდი არის ის უმაღლესი ორგანო, რომელიც ქართულ მართლმადიდებულურ ეკლესიას მართავს, შესაბამისად, დარწმუნებული ვარ, რომ მღვდელმთავრებს, სინოდის შემადგენლობაში მყოფ პირებს ნამდვილად შესწევთ იმის უნარი, რომ სწორი, სამართლიანი და ობიექტური გადაწყვეტილებები მიიღონ. ამის იმედი ნამდვილად მაქვს“, - აცხადებს მეხრიშვილი.