„ქართულ ოცნებას“ არ აინტერესებს ის, რომ საერთაშორისო საზოგადოება და მისი ამომრჩეველი იმედგაცრუებულია, რადგან „ქართულმა ოცნებამ“ მისი იმიჯი ძალაუფლებაზე გაცვალა", - ამის შესახებ „ევროპული საქართველოს“ ერთ-ერთმა ლიდერმა სერგო რატიანმა განაცხადა.
რატიანის თქმით, "ქართული ოცნება" ძალაუფლების მოსაპოვებლად ეთნონაციონალურ გრძნობებს, სოციალურ და რელიგიურ გრძნობებს ეთამაშებოდა.
„იმედგაცრუება არა მხოლოდ ვენეციის კომისიის პრეზიდენტის ჯანი ბუკიკიოს გრძნობაა, იმედგაცრუებულია ქართული საზოგადოება, მთელი პოლიტიკური სპექტრი და ის პოლიტიკური გუნდებიც, რომლებიც თქვენ გიჭერდნენ მხარს. იმედგრაცრუებულია ყველა, რადგან თქვენ მოატყუეთ მთელი ქართული საზოგადოება. თქვენ მოატყუეთ საერთაშორისო საზოგადოება, პოლიტიკური სპექტრი და პირველ რიგში, თქვენ მოატყუეთ თქვენი ამომრჩეველი.
ამ ძალაუფლების მოსაპოვებლად თქვენ ისეთი რამეები ჩაწერეთ ამ კონსტიტუციაში, რომ უბრალოდ სირცხვილია. ამ ძალაუფლების მოსაპოვებლად თქვენ ეთამაშებოდით ეთნონაციონალურ გრძნობებს, სოციალურ და რელიგიურ გრძნობებს. ეს არის პოპულიზმის უმსგავსო ფორმები. ეს არის პოპულიზმის ფორმები, როდესაც თქვენ ვითომ ქართული მიწის სიყვარულით, აუკრძალეთ საქართველოს მოქალაქეს გაეყიდა მიწა და ფაქტობრივად, შეზღუდეთ ადამიანის კერძო საკუთრება, საბჭოთა მარქსისტული წესით აუკრძალეთ კონკრეტულ პირებს და ეს უფლება გადაეცით სახელმწიფოს. შემდეგ გააკეთეთ ის, რომ რელიგიური თავისუფლება შეზღუდეთ. ესეც უმსგავსო საქციელია“, - განაცხადა რატიანმა.