ბათუმში, მახოს ხიდი გონიოს ხიდს მალე ახალი საავტომობილო გზით დაუკავშირდება. 5,7 კილომეტრი სიგრძის გზის მოწყობის სამუშაოები ჭოროხისპირის ქუჩაზე დაიწყო. 
პროცესს აჭარის მთავრობის თავმჯდომარე ზურაბ პატარაძე, აჭარის ფინანსთა და ეკონომიკის მინისტრთან რამაზ ბოლქვაძესთან, ჯანმრთელობისა და სოციალური დაცვის მინისტრთან ზაალ მიქელაძესთან და სხვა ოფიციალურ პირებთან ერთად გაეცნო. პროექტის შესახებ ინფორმაცია მთავრობის წარმოამდგენლებს გზებისა და სამელიორაციო სისტემების მართვის დეპარტამენტის უფროსმა არჩილ ჩიქოვანმა გააცნო. 
ახალი გზის მონაკვეთი მახოს ხიდს გონიოს ხიდთან დააკავშირებს. 
ამ ეტაპზე ჭოროხისპირის გზის ასფალტო/ბეტონის საფარის მოწყობა 1000 მეტრზე მიმდინარეობს. 
აღნიშნული პროექტის ფარგლებში 197 მეტრი სიგრძის გაბიონი, 190 მეტრი ბეტონის საყრდენი კედელი, 140 მეტრი მონოლითური რკ. ბეტონის სწორკუთხა მილი და 54 მეტრი ლითონის მილი მოეწყობა. 
სამუშაოების ღირებულება 1 031 073 ლარია. სამუშაოებს შპს „ტ.ტ.“ წლის ბოლოსთვის დაასრულებს.