"ვეტოს გაზიარების შემთხვევაში იტყვით თუ არა, რომ თქვენი აზრით, საქართველოს ექნება კარგი კონსტიტუცია"? - ამ შეკითხვით პრეზიდენტის საპარლამენტო მდივან ანა დოლიძეს, ფრაქცია "ქართული ოცნების" თავმჯდომარემ, მამუკა მდინარაძემ მიმართა.
მდინარაძის განცხადებით, ანა დოლიძემ მოტივირებული შენიშვნების წარდგენისას მხოლოდ პოლიტიკურ ასპექტებზე ისაუბრა და შენიშვნების სამართლებრივი არგუმენტი არ დაუსახელებია.
”გუშინ ბევრი მცდელობის მიუხედავად ვერ მივიღეთ პასუხი იურიდიულ არგუმენტებთან დაკავშირებით, დღეს მთელი გამოსვლის განმავლობაში არც ერთი იურიდიული და სამართლებრივი არგუმენტი არ დაგისახელებიათ, მხოლოდ პოლიტიკურ არგუმენტებზე მიუთითებდით. კითხვა მაქვს ასეთი - ვეტოს გაზიარების შემთხვევაში იტყვით თუ არა, რომ თქვენი აზრით, საქართველოს ექნება კარგი კონსტიტუცია?! ასევე, თქვენ ამბობდით ოპოზიციასთან ერთად, რომ ხალხს ართმევენ პრეზიდენტის არჩევის უფლებას, იმ შემთხვევაში თუ პარლამენტი ვეტოს გაიზიარებს, მაშინ რა გამოდის, ორპალატიანი პარლამენტის არსებობის შემთხვევაში თქვენ უშვებთ, რომ ორპალატიანმა პარლამენტმა შეიძლება ხალხს წაართვას პრეზიდენტის არჩევის უფლება, თუ როგორ არის?! აქვე, რომელი ნორმა არსებობს სამართლებრივ საფუძველში, რაც პირდაპირი არჩევის შემთხვევაში რაიმე განსაკუთრებულ წესს ადგენს საქართველოს მოქმედ, ან ახალ კონსტიტუციაში, რომელიც უზრდის რაიმე ფუნქციას პრეზიდენტს იმ ბალანსისთვის, რაზეც თქვენ საუბრობდით?! გუშინ როგორც იქნა აღიარეთ, რომ ამ კონსტიტუციას აქვს ხუთი პარტიის მხარდაჭერა და დღეს რატომ შეცვალეთ ეს მესიჯი?! ხუთი პუნქტი და ვალდებულება ახსენეთ, რას გულისხმობთ რა ვალდებულება გვაქვს მეხუთე აღებული, იქნებ შეგვახსენოთ”, - მიმართა მდინარაძემ დოლიძეს პარლამენტის რიგგარეშე სხდომაზე, საკონსტიტუციო ცვლილებებთან დაკავშირებით პრეზიდენტის მოტივირებულ შენიშვნების განხილვისას.