საქალაქო სასამართლოში გოგა ხაინდრავასპროცესი გადაიდო. მოსამართლე ქეთევან კუჭავამ ბრალდების მხარის შუამდგომლობა დააკმაყოფილა და მტკიცებულებების მოსაპოვებლად მხარეებს 14 სამუშაო დღე მისცა.
„საერთაშორისო გამჭვირვალობა - საქართველოს“ აღმასრულებელი დირექტორი ეკა გიგაური რეჟისორ გოგა ხაინდრავას პატივისა და ღირსების შელახვის გამო, სასამართლოში უჩივლა. ეკა გიგაური სიმბოლურად, მორალური ზარალის ანაზღაურებას 30 თეთრის ოდენობით ითხოვს.
ხაინდრავა სასამართლოში შს ყოფილი მინისტრის ვანო მერაბიშვილის, სასაზღვრო პოლიციის ყოფილი უფროსის ბადრი ბიწაძისა და ბარისახოს მესაზღვრეების დაკითხვას მოითხოვს. მან ჟურნალისტებთან განაცხადა, რომ სასაზღვრო პოლიციიდან გამქრალია 2007 წლის 7 ნოემბრის აქციის დარბევაში ეკა გიგაურის მონაწილეობის დამადასტურებელი დოკუმენტები.
გოგა ხაინდრავა ამტკიცებს, რომ კაპიტნის წოდება გიგაურმა სწორედ 7 ნოემბრის აქციის დარბევის გამო მიიღო, მისივე ხელმოწერით 7 ნოემბრის დარბევაში მონაწილე ბარისახოს მესაზღვრეები კი პრემიით დაჯილდოვდნენ.
ეკა გიგაურის ადვოკატის ოლიკო შერმადინის თქმით კი, სასაზღვრო პოლიციას და ეკა გიგაურს 7 ნოემბრის დარბევაში არანაირი მონაწილეობა არ მიუღია.
