აუცილებელია კეთილი ნების ქვეყნების მიერ მოხდეს საერთო სტრატეგიის შემუშავება, რომელიც რუსეთის აგრესიულ პოლიტიკას პასუხს გასცემს, - ამის შესახებ საქართველოს პრეზიდენტმა ბათუმში თავდაცვისა და უსაფრთხოების კონფერენციაზე განაცხადა.
საქართველოს ნატო-ში ინტეგრაცია, უსაფრთხოება და საქართველოს შეიარაღებული ძალების რეფორმა - კონფერენცია ამ თემაზე თავდაცვის მინისტრმა გახსნა.
გიორგი მარგველაშვილმა ოკუპირებულ რეგიონებში არსებულ მდგომარებაზე და რუსეთის აგრესიულ პოლიტიკაზე გაამახვილა ყურადღება.
„სულ ახალ შეზღუდვებს, სულ ახალ გამყოფ ხაზებს ააგებს ჩვენს ტერიტორიაზე და ასევე ზღუდავს იმ გადასასვლელ პუნქტებს, რომელიც არსებობს საქართველოს მთავარ ტერიტორიასა და ოკუპირებულ რეგიონებს შორის. ამას ახორციელებს სახელმწიფო, რომელიც არის გაეროს უშიშროების საბჭოს წევრი, სახელმწიფო, რომელსაც უნდა ამაღლებული პასუხისმგებლობა ჰქონდეს, როგორც მშვიდობისა და სტაბილურობის გარანტს და კეთილი ნების ქვეყნებმა უნდა მოვახერხოთ, რომ შევქმნათ ერთიანი სტრატეგია, რომელიც ნათელ პასუხს გასცემდა რუსეთის პოლიტიკას, თავიანთი მეზობლების მიმართ,“-განაცხადა საქართველოს პრეზიდენტმა.
ღონისძიებას ქვეყნის უმაღლესი მთავარსარდალი, მთავრობის მეთაური და სხვა მაღალი რანგის პოლიტიკოსები ესწრებიან. კონფერენციაში ნატო-ს გენერალური მდივნის სპეციალური წარმომადგენელი ჯეიმს აპატურაიც მონაწილეობს.
