პროკურატურიდან გამოსვლის შემდეგ, „ჯი-ეიჩ-ენთან“ კომენტარი გააკეთა მსჯავრდებულ დეკანოზ გიორგი მამალაძის ადვოკატმა, პაატა მეხრიშვილმა. როგორც მეხრიშვილი აცხადებს, გამომძიებლებს აინტერესებდათ, თუ ვისგან გავრცელდა დახურული სხდომებიდან მასალები და ასევე, მისცემდნენ თუ არა ადვოკატები ჩვენებას უკვე სასამართლოში, მაგისტრი მოსამართლის თანდასწრებით.
„როგორც იცით, გამოძიება დაწყებულია გამოძიების მასალების გახმაურების ფაქტზე. აინტერესებდათ, გვქონდა თუ არა ინფორმაცია, ვის შეიძლებოდა ეს მასალები გაეხმაურებინა. ჩვენ პირდაპირ ვუთხარით, ამ ინფორმაციას ჩვენ რომც ვფლობდეთ, ეს ინფორმაცია როგორც ადვოკატის უფლებამოსილების განხორციელებასთან დაკავშირებით გვექნებოდა. საპროცესო კანონმდებლობა უფლებას გვაძლევს, რომ ასეთი ინფრომაცია გამოძიებას არ მივცეთ. ადვოკატთა შესახებ კანონი და ადვოკატთა პროფესიული ეთიკის კოდექსი გვავალდებულებს, რომ ყველა ის ინფორმაცია, რომელიც ჩვენთვის ცნობილი გახდა ჩვენი დასაცავი პირის საქმესთან დაკავშირებით, კონფიდენციალურად შევინახოთ.
ჩვენ გამოვიყენეთ ეს უფლება, რომ ჩვენება არ მიგვეცა. მათ ასევე აინტერესებდათ, იგივე პოზიცია გვექნებოდა თუ არა იმ შემთხვევაშიც, თუკი, პროკურატურა სასამართლოს მიამართავდა შუამდგომლობით, მაგისტრ მოსამართლესთან ჩვენი დაკითხვის თაობაზე, რაზეც იგივე პოზიცია გვქონდა. ჩვენ კი ვთვლით, რომ ხარისხიანი მართლმსაჯულების პირობებში, სასამართლომ ასეთი შუამდგომლობა არ უნდა დააკმაყოფილოს და არ უნდა დაგვავალდებულოს, ჩვენება იმასთან დაკავშირებით მივცეთ, რაც ჩვენთვის ჩვენი პროფესიული მოვალეობის შესრულებასთან დაკავშირებით გახდა ცნობილი“, - განაცხადა პაატა მეხრიშვილმა.
შეგახსენებთ, რომ პროკურატურამ დეკანოზ გიორგი მამალაძის სისხლის სამართლის საქმის მასალების, გამოძიების მონაცემების მედიასაშუალებებით გავრცელების ფაქტზე გამოძიება 3 ოქტომბერს დაიწყო.