დღეს, 13 ივლისს, სვეტიცხოვლის ეზოში ჩვილთა მე-12 ნათლობა გაიმართება. ნათლობა სვეტიცხოვლის საკათედრო ტაძრის ეზოში, 16:00 საათის შემდეგ დაიწყება და 700-მდე ბავშვი მოინათლება. მე-12 ნათლობისთვის ჩვილთა რეგისტრაცია საქველმოქმედო ფონდ "ლაზარეში~ 18-20 ივნისის ჩათვლით მიმდინარეობდა.
პატრიარქის ინიციატივით, პატრიარქის ნათლულები ის ბავშვები იქნებიან, რომლებიც საქართველოს ნებისმიერი ეროვნების, საქართველოს მოქალაქეობის მქონე ოჯახში მესამე ან მომდევნო შვილია. ტრადიციას საფუძველი 2008 წლის 19 იანვარს, ნათლისღების დღეს, ჩაეყარა. ამჯამად პატრიარქს 5000-ზე მეტი ნათლული ჰყავს. მიზანი საქართველოში დემოგრაფიული მდგომარეობის გაუმჯობესებაა. ჩვილთა მე-11 ნათლობა წელს გაზაფხულზე, კვირაცხოვლობას გაიმართა.
