სირიაში რუსი გენერლის დაღუპვაზე მოსკოვი პასუხისმგებლობას ვაშინგტონს აკისრებს. საგანგებო განცხადება რუსეთის საგარეო საქმეთა მინისტრმა სერგეი რიაბკოვმა გააკეთა.
„ეს ის ფასია, რომელსაც რუსეთი შეერთებული შტატების ორპირობის გამო იხდის. ვაშინგტონი აცხადებს, რომ ისლამისტების განადგურებით არის დაინტერესებული, მაგრამ საწინააღმდეგოს აკეთებს. მათთვის გეოპოლიტიკური ამოცანების შესრულება უფრო მნიშვნელოვანია,“-აღნიშნა რიაბკოვმა.
სირიაში მორიგი დანაკარგი რუსეთმა გუშინ განიცადა. „ისლამურ სახელმწიფოს“ დაჯგუფების წინააღმდეგ მიმდინარე ოპერაციისას გენერალ-ლეიტენანტი ვალერი ასაპოვი დაიღუპა. რუსეთის თავდაცვის სამინისტროს განცხადებით, ასაპოვი სირიის სახელისუფლო ძალებს დეირ-ეზ-ზორის გათავისუფლების ოპერაციის მართვაში ეხმარებოდა. მან სასიკვდილო ჭრილობები ნაღმის აფეთქებისას მიიღო. ასაპოვი რუსეთის შეიარაღებულ ძალებში 1983 წლიდან მსახურობდა. 1992-1993 წლებში ის ცხინვალის რეგიონში მიმდინარე საბრძოლო მოქმედებებში მონაწილეობდა, 2000-2002 წლებში კი აფხაზეთში სამშვიდობო ძალების შემადგენლობაში სხვადასხვა თანამდებობებს იკავებდა.