განათლების, მეცნიერების და კულტურის კომიტეტის თავმჯდომარე მარიამ ჯაში აშშ-ს აერონავტიკის და კოსმოსური სივრცის კვლევის ეროვნული სამმართველოს (NASA-ს) კოსმოსური ხომალდების, ვოიაჯერ 1-ისა და ვოიაჯერ 2-ის კოსმოსში გაშვების 40 წლის იუბილესთან დაკავშირებით საქართველოში მყოფ "ვოიაჯერის" პროგრამის ხელმძღვანელთან, ჯონ კასანთან და მარსის პროგრამის მთავარი ინჟინერთან, რობ მენინგტან ერთად „სტარტაპების" მონაწილეებს შეხვდა და მეცნიერის, კარლ საგანის ლაბორატორიის გახსნას დაესწრო. მეცნიერები საქართველოში მეცნიერების და განათლების ფონდის „ნოვა"-ს ხელმძღვანელის, რამაზ ბლუაშვილის და ამერიკის საელჩოს მოწვევით ჩამოვიდნენ.
"ჩაკრულოს კვირეულის" ფარგლებში გამართულ ღონისძიებაზე კომიტეტის თავმჯდომარე სიტყვით გამოვიდა.
„ეს არის ისტორიული მოვლენა. დღეს თბილისს თანამედროვე მეცნიერების ორი ცოცხალი ლეგენდა ესტუმრა. კვირეული ეძღვნება ოქროს დისკზე ჩაწერილი ქართული პოლიფონიური შედევრის, „ჩაკრულოს" კოსმოსში გაშვებას. დაგეგმილი ღონისძიებების პარალელურად განათლების, მეცნიერებისა და კულტურის კომიტეტი განვიხილავთ მომავალ შესაძლო თანამსრომლობას როგორც სტუდენტების, ასევე მეცნიერების გაცვლის თვალსაზრისით. ჩვენ NASA-ში არ გვყავს ქართველი მეცნიერები, განსხვავებით ატომური კვლევების ევროპული ორგანიზაციისგან - CERN-ისგან, რომელიც ასევე ლიდერია ზუსტი მეცნიერებების კუთხით. დიდი იმედი გვაქვს, რომ მომავალი ვიზიტისთვის ჩვენ უკვე გვეყოლება ქართველი თანამემამულეები, რომლებიც აქტიურად იქნებიან ჩართულები NASA-ს პროგრამებში" , - განაცხადა მარიამ ჯაშმა.
ხომალდი ვოიაჯერ 1 1977 წლის 5 სექტემბერს გაუშვეს კოსმოსში. 2012 წელს, მან მზის სისტემა დატოვა და ამჟამად ვარსკვლავთშორის სივრცეში იმყოფება. ვოიაჯერ 1 კაცობრიობის ერთადერთი ქმნილებაა, რომელმაც მშობლიური მზის სისტემა დატოვა. ვოიაჯერ 2 1977 წლის 20 აგვისტოს გაუშვეს და მალე მზის სისტემას ისიც დატოვებს.
ვიზიტის ფარგლებში, 28 სექტემბერს, 16 საათზე, თბილისის ოპერისა და ბალეტის სახელმწიფო თეატრში, გაიმართება NASA-ს მარსის პროგრამის მთავარი ინჟინრის, რობ მენინგის საჯარო ლექცია, რამაზ ბლუაშვილის ფილმის ჩვენება და ერისიონის კონცერტი.