იურიდიულ კომიტეტის სხდომაზე პარლამენტის თავმჯდომარეს უსმენენ. ირაკლი კობახიძე საკონსტიტუციო ცვლილებებს მესამე მოსმენით წარადგენს.
მესამე მოსმენა შინაარსის ცვლილებებას არ ითვალისწინებს, ამიტომ კობახიძე მხოლოდ ტექნიკურ ცვლილებებზე საუბრობს. იურიდიულ კომიტეტზე სრული დასწრებაა.კომიტეტის სხდომას, საპარლამენტო უმრავლესობის გარდა, საპარლამენტო ოპოზიციაც ესწრება.
ირაკლი კობახიძის თქმით, ბონუსის ამოღება და საარჩევნო ბლოკების ერთჯერადად დატოვება არარედაქციული შესწორებებია, აქედან გამომდინარე, ამისთვის ახალი კონსტიტუციური კანონის წარდგენა გახდება საჭირო.
„ჩვენ გვქონდა კონსულტაციები ვენეციის კომისიასთან. კომისიას ჰქონდა გარკვეული მოსაზრებები, რომლებიც არ იყო სარედაქციო ხასიათის და ჩვენ გამოვთქვით მზადყოფნა, რომ შესაბამისი შესწორებები შევიტანოთ უკვე წარმოდგენილ ცვლილებებში, ოღონდ ამას დასჭირდება ახალი პროცესი, ახალი კონსტიტიუციური კანონის ინიცირება. საქმე შეეხება ბონუსის ამოღებას ძირითადი ტექსტიდან და ერთჯერადად საარჩევნო ბლოკების დატოვებას. ორივე არის არასარედაქციო შეწორება, აქედან გამომდინარე, დაგვჭირდება ახალი პროცესის ინიცირება და ახალი კონსტიტუციური კანონის წარდგენა საქართველოს პარლამენტში“, - განაცხადა კობახიძემ.