თურქეთი რეფერენდუმის გამო ქურთებთან ომს არ აპირებს. ამის შესახებ ქვეყნის პრემიერ-მინისტრმა ბინალი ილდირიმმა განაცხადა. მისივე თქმით, შეიარაღებული კონფლიქტი ერაყის ქურთისტანთან გამორიცხულია, თუმცა საკუტარი უსაფრთხოების დასაცავად თურქეთი საჭორო ზომებს მიიღებს. ილდირიმის განცხადებით, უკანონო რეფერენდუმს თურქეთი ეკონომიკური სანქციებით უპასუხებს.
ერაყის ქურთისტანში დამოუკიდებლობის რეფერენდუმი ინციდენტების გარეშე მიმდინარეობს. საარჩევნო უბნები ადგილობრივი დროით დილის 7 საათზე გაიხსნა და 18 საათზე დაიხურება. რეფერენდუმში მონაწილეობის მისაღებად 5,2 მილიონი ამომრჩეველია დარეგისტრირებული. მათ პასუხი უნდა გასცენ კითხვას, სურთ თუ არა, ქურთისტანის რეგიონი და მის ფარგლებს გარეთ მდებარე ქურთული ტერიტორიები დამოუკიდებელი სახელმწიფო გახდეს. ერთ-ერთ უბანზე საკუთარი არჩევანი უკვე დააფიქსირა ქურთისტანის ლიდერმა მასუდ ბარზანიმ.
პლებისციტის ჩატარებას კატეგორიულად ეწინააღმდეგებოდა ბაღდადი და ანკარა. ქურთებს რეფერენდუმის გადადებისკენ შეერთებული შტატებიც მოუწოდებდა.
