"ბავშვს დეტალური კვლევა უტარდება და ანტიშოკურ მკურნალობას გადის", - ამის შესახებ 206-ე ბაღის მეორე სართულიდან გადმოვარდნილი ბავშვის მკურნალმა ექიმმა განაცხადა.
ექიმის განმარტებით, 3 წლის ბავშვის მდგომარეობა სტაბილურია, მაგრამ მას აღენიშნება სახის მოტეხილობა და ფილტვის დაზიანება.
„არსებული კვლევებით ფიქსირდება მარცხენამხრივი ჰემოპლემოთორაქსი. დაიწყო ანტიშოკური მკურნალობა. აყვანილ იქნა ინტენსიური თერაპიის განყოფილებაში შემდგომი მკურნალობისთვის,“ - განაცხადა მკურნალმა ექიმმა.
ექიმის ინფორმაციით, ამ ეტაპზე ბავშვი ქირურგიულ ჩარევას არ საჭიროებს.
შეგახსენებთ, დღეს დილით ზემო ფონიჭალაში მდებარე 206-ე ბაგა-ბაღის მეორე სართულიდან სამი წლის აღსაზრდელი გადმოვარდა.
მომხდარზე მიმდინარეობს გამოძიება სისხლის სამართლის კოდექსის 124-ე მუხლით, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.