პარლამენტთან „პატრიოტთა ალიანსის“ წევრი ბეჟან გუნავა დააკავეს.
არსებული ინფორმაციით, ბეჟან გუნავას დაკავებას უძღოდა სიტყვიერი და ფიზიკური დაპირისპირება „პატრიოტთა ალიანსის“ წევრებსა და სამართალდამცავებს შორის.
როგორც ირკვევა, პარლამენტის შენობასთან „პატრიოტთა ალიანსის“ წევრები ბანერების განთავსებას ცდილობდნენ, თუმცა მათ ამის უფლება პოლიციამ არ მისცა. პარტიის წევრებმა ბანერების განთავსება მეორედაც სცადეს, რასაც პარტიის წევრებსა და სამართალდამცავებს შორის დაპირისპირება მოჰყვა.
ამ დროისთვის, ადგილზე რჩებიან საპატრულო პოლიციის წარმომადგენლები და „პატრიოტთა ალიანსის“ წევრები.
ცნობისთვის, როგორც „პატრიოტთა ალიანსში“ აღნიშნავენ, პარლამენტთან პარტიის რამდენიმე წევრი შიმშილობს.
ფოტო: საზოგადოებრივი მაუწყებელი