Etihad Airways-ი აზერბაიჯანის ბაზარზე შედის. აღნიშნულის შესახებ განცხადება აზერბაიჯანის ეკონომიკის მინისტრის შაჰინ მუსტაფაევისა და აზერბაიჯანში არაბეთის გაერთიანებული საემიროების ელჩის მუჰამედ აჰმედ ხამილ ალ გუბასის შეხვედრის შემდეგ გახდა ცნობილი.
როგორც აზერბაიჯანის ეკონომიკის სამინისტროში განმარტავენ, შეხვედრაზე აზერბაიჯანისა და არაბეთის გაერთიანებული საემიროებს შორის ეკონომიკური ურთიერთობების გაღრმავებაზე იმსჯელეს.
„2018 წლიდან ავიაკომპანია Etihad Airways-ი აზერბაიჯანის მიმართულებით ფრენებს იწყებს, რაც მხარეებს შორის ურთიერთობების გაღრმავებაში დიდ როლს ითამაშებს“, განაცხადა ელჩმა.
ეკონომიკის მინისტრის თქმით კი არაბეთის გაერთიანებული საემიროებიდან ტურისტების რაოდენობა 30-ჯერაა გაზრდილი.
აღსანიშნავია, რომ „Etihad Airways”-ი ქართულ ბაზარზე ჯერ კიდევ 2015 წელს უნდა შემოსულიყო. „ტავ ჯორჯიამ“ აღნიშნულის შესახებ ინფორმაცია ჯერ კიდევ 2014 წლის 22 სექტემბერს გაავრცელა, სადაც აღნიშნული იყო, რომ არაბთა გაერთიანებული საამიროების ნაციონალური ავიაკომპანია „Etihad Airways”-ი 2015 წლის 2 ოქტომბრიდან ქართულ ავიაბაზარზე შემოსვლას გეგმავდა.
„არაბული ავიაკომპანია ფრენებს თბილისის საერთაშორისო აეროპორტის მიმართულებით, აბუ დაბი-თბილისი-აბუ დაბის რეისზე, კვირაში სამჯერ, ოთხშაბათს, პარასკევსა და კვირას Airbus A320 ტიპის ბორტით შეასრულებს.
„მოხარული ვარ, რომ თბილისის საერთაშორისო აეროპორტიდან მგზავრებს აბუ დაბის მიმართულებით მსოფლიოს ერთ-ერთი უმსხვილესი და წამყვანი ავიაკომპანია „Etihad Airways“ მოემსახურება. ჩვენ დარწმუნებულები ვართ, რომ მსგავსი სიახლე მნიშვნელოვნად გაზრდის საქართველოს და ზოგადად კავკასიის რეგიონით დაინტერესებულ ტურისტთა რაოდენობას. ჩვენ ვიმედოვნებთ, რომ თბილისისა და ბათუმის საერთაშორისო აეროპორტების, ოპერატორი კომპანია „ტავ ჯორჯია“ ხელს შეუწყობს არაბთა გაერთიანებულ საამიროებსა და საქართველოს შორის საქმიანი, ეკონომიკური და ტურისტული ურთიერთობების კიდევ უფრო გაღრმავებას.“ - განაცხადა „ტავ ჯორჯია“-ს გენერალურმა მენეჯერმა მეთე ერქალმა“, აღნიშნული იყო „ტავ ჯორჯიას“ მიერ გავრცელებულ ინფორმაციაში.
ანალოგიური სახლის შესახებ საუბარია 2015 წლის 22 აპრილს ეკონომიკისა და მდგრადი განვითარების სამინისტროს მიერ გავრცელებულ პრესრელიზშიც, სადაც სამინისტრო ახალი მიმართულებების შესახებ გვამცნობს.
"არაბულმა ავიაკომპანია „Etihad Airways“-მა გამოთქვა სურვილი, შეასრულოს პირდაპირი რეგულარული საჰაერო მიმოსვლა თბილისსა და აბუ-დაბის შორის. ამასთან დაკავშირებით უკვე დაიწყო კონსულტაციები სამოქალაქო ავიაციის სააგენტოს წარმომადგენლებთან შესაბამისი ნებართვის მისაღებად. კომპანიის მიერ მოწოდებული ინფორმაციის თანახმად, ავიაკომპანია პირდაპირი რეგულარული საჰაერო მიმოსვლის შესრულებას 2015 წლის 2 ოქტომბრიდან გეგმავს, კვირაში 3 სიხშირით", აღნიშნულია სამინისტროს 2015 წლის 22 აპრილით დათარიღებულ პრესრელიზში.
