"კორტების საქმეზე" მსჯავრდებული ირაკლი ფირცხალავას ოჯახი პრეზიდენტს მოქალაქეობის ჩამორთვის თხოვნით მიმართავს, რის შემდეგაც პოლიტიკური თავშესაფრის მოთხოვნას აპირებენ.
ნინო ხვიტიამ ჟურნალისტებს ის აუდიოჩანაწერი მოასმენინა, რომელშიც კრიმინალური პოლიციის ყოფილი უფროსი ირაკლი ფირცხალავა საქმის მთავარ მოწმეზე კობა გოგატიშვილზე ამბობს, რომ ის ცრუ მოწმეა და საქმესთან შეხება არ ჰქონია.
ვიდეოჩანაწერში ირაკლი ფირცხალავა აცხადებს, რომ კობა გოგატიშვილს ინფორმაცია არა "კორტების საქმეზე", არამედ იური ვაზაგაშვილის მკვლელობის შესახებ აქვს.
"ჩვენს ოჯახს დევნიან. ჩემი მეუღლე ამბობს, რომ სანამ იური ვაზაგაშვილი იყო ცოცხალი, მოწმე კობა გოგატიშვილმა მოისმინა, რომ იგეგმებოდა მისი მკვლელობა. ჩემი მეუღლე ამ ამბის სასწრაფოდ გამოძიებას ითხოვს. ჩემს მეუღლეს ეს ინფორმაცია ადვოკატისგან აქვს. ამის შესახებ თავად გოგატიშვილმა სახალხო დამცველთან ილაპარაკა", - განაცხადა ნინო ხვიტიამ.
12 სექტემბერს ირაკლი ფირცხალავას მეუღლე ნინო ხვიტია მაგისტრ მოსამართლეთა წინაშე გამოკითხვაზე იმყოფებოდა.
9 სექტემბერს კორტების სპეცოპერაციის საქმის მთავარმა მოწმემ კობა გოგატიშვილმა განაცხადა, რომ მასზე ზეწოლა ხორციელდება. მისი თქმით, საქმეზე ბრალდებულ ირაკლი ფირცხალავას მეუღლე და შვილი გოგატიშვილზე ზეწოლას ახორციელებდნენ.
