წლის ნოლომდე ნორვეგიაში ქართული ღვინო გაიყიდება. ნორვეგიის სახელმწიფო კომპანია Vinmonopolet -მა, 2010 წლის მეორე ნახევარში ტენდერების საფუძველზე შესაძენი ალკოჰოლური სასმელების ნუსხაში, ქართული ღვინოც შეიტანა, ამის შესახებ სააგენტო "ჯი-ეიჩ-ენს" ევროკავშირ-საქართველოს ბიზნეს საბჭოს ხელმძღვანელმა კოტე ზალდასტანიშვილმა აცნობა.
ზალდასტანიშვილის, ინფორმაციით, სატენდერო პირობების თანახმად ნორვეგია მხოლოდ 2007 წლიდან ჩამოსხმულ, თეთრ ღვინოს მიიღებს, რომლის ღირებულებაც 300 ნორვეგიულ კრონზე ნაკლები იქნება.
საბაზო და ერთჯერადი პარტიის ნომენკლატურის ალკოჰოლური სასმელების შესაძენად, Vinmonopolet -ი ტენდერს ორ თვეში ერთხელ აცხადებს. ტენდერის დროს ხდება იმპორტიორებისგან წინადადებების მიღება და მათი კონტროლი, ხოლო შემდეგ პროდუქციის "ანონიმური" დეგუსტაცია. დეგუსტაციის შემდეგ იწყება შესასყიდი პროდუქტის შეფასების და გადაწყვეტილების მიღების პროცესი. შეფასებისას Vinmonopolet -ი მაქსიმალური ობიექტურობის პრინციპით სარგებლობს, ანუ გამორიცხავს პროტექციონიზმს რომელიმე პროდუქტის, ქვეყნის ან მომწოდებლის მიმართ. შეფასების კრიტერიუმს არა მხოლოდ პროდუქციის ფასი, არამედ ხარისხი, მომხმარებლის მოთხოვნები, და მოწოდების პირობები წარმოადგენენ.
იმ შემთხვევაში თუ Vinmonopolet -ს და იმპორტიორს შორის ალკოჰოლურ სასმელზე ფიქსირებული ფასი არ არის შეთანხმებული, იმპორტიორს შეუძლია პროდუქტის ფასი გაზარდოს, თუმცა ამისი გაკეთება მხოლოდ 1 იანვრიდან, 1 მაისიდან ან 1 სექტემბრიდან არის დასაშვები. რაც შეეხება პროდუქტის ფასის შემცირებას, ეს ნებისმიერ დროს არის შესაძლებელი.
აღსანიშნავია, რომ ნორვეგიის ბაზარზე ალკოჰოლური სასმელების საცალო რეალიზაცია მხოლოდ Vinmonopolet -ის გამგებლობაში მყოფ მაღაზიებში ხდება.
შეგახსენებთ, რომ ნორვეგიის ხელისუფლებამ ცენტრალიზებული მონოპოლიის ჩამოყალიბების გადაწყვეტილება მიიღო და 1922 წლის 30 ნოემბერს, Vinmonopolet -ი დაფუძნდა, რომელიც სახელმწიფოს მიერ კონტროლირებად კომპანიას წარმოადგენდა. ამ დროისათვის Vinmonopolet -ს გააჩნდა როგორც 4,75%-ზე მეტი ალკოჰოლის შემცველობის ალკოჰოლური სასმელების (სპირტიანი ალკოჰოლური სასმელებისა და შემაგრებული ღვინოების გარდა) იმპორტის, ჩამოსხმისა და წარმოების, ასევე ნორვეგიის მთელ ტერიტორიაზე მათი რეალიზაციის ექსკლუზიური უფლება.
Vinmonopolet -ის მაღაზიების რაოდენობას, დამტკიცებული ეროვნული გეგმის საფუძველზე, ნორვეგიის ჯანმრთელობის დაცვისა და სოციალურ საქმეთა სამინისტრო განსაზღვრავს, თუმცა, გადაწყვეტილებას, მაღაზიათა კონკრეტული ადგილმდებარეობის შესახებ Vინმონოპოლეტ-ის დირექტორთა საბჭო იღებს.
ალკოჰოლური პროდუქციის შეძენის მიზნით, Vinmonopolet -ი, წელიწადში ორჯერ (ივნისში და დეკემბერში) ბაზრისა და პროდუქციის გეგმას აქვეყნებს. ხსენებული გეგმა მოიცავს იმ პროდუქციის ნუსხას, რომლის შეძენასაც Vinmonopolet -ი, მომდევნო 12 თვის განმავლობაში, საბაზო და ერთჯერადი პარტიის ნომენკლატურებში ტენდერის საფუძველზე აპირებს.